پشاور ......عوامی نیشنل پارٹی کے سینئر رہنما سینیٹر محمد اعظم خان ہوتی 68 سال کی عمر میں وفات پاگئے۔ وہ اے این پی کے قائد اسفندیار ولی کے برادر نسبتی، بیگم نسیم ولی خان کے بھائی اور سابق وزیر اعلیٰ امیر حیدر ہوتی کے والد تھے۔ اعظم ہوتی نے فعال سیاسی زندگی گزاری وہ 2 مرتبہ وفاقی وزیر رہے۔ محمد اعظم خان ہوتی 27 اپریل 1946 کو مردان کے سرکردہ سیاسی رہنما امیر محمد خان کے ہاں پیدا ہوئے۔ ابتدائی تعلیم رسالپور سے حاصل کی۔ایچی سن کالج لاہور سے ایف ایس سی کے بعد گورنمنٹ کالج نوشہرہ سے گریجویشن کی ڈگری حاصل کی۔ اعظم ہوتی نے 1967 میں پاک فوج میں کمیشن حاصل کیا۔ 1971 کی پاک بھارت جنگ میں انہوں نے کیپٹن کی حیثیت سے شرکت کی ۔ تاہم 1972 میں فوج کی ملازمت چھوڑ دی اور نیشنل عوامی پارٹی(نیپ )کے پلیٹ فارم سے سیاست کا آغاز کیا۔ نیپ پر پابندی کے باعث دیگر سرکردہ رہنماوں کی طرح اعظم ہوتی کو بھی جلاوطنی کی زندگی اختیار کرنی پڑی۔ نئی جماعت عوامی نیشنل پارٹی بنی تو اس کے بانیوں میں اعظم ہوتی بھی شامل تھے۔ وہ اے این پی کی یوتھ ونگ ننگیالے پختون کے بھی بانی رہے ہیں۔ 1991 اور 1997 کے عام انتخابات میں عوامی نیشنل پارٹی کے ٹکٹ پر قومی اسمبلی کے ممبر اور دونوں ہی مرتبہ وفاقی وزیر مواصلات رہے۔ مارچ 2012 میں وہ اے این پی کے ٹکٹ پر سینٹ کے رکن منتخب ہوئے۔وہ کچھ عرصے سے گلے کے کینسر میں مبتلا تھے۔ 68 سال کی بھر پور زندگی گذارنے کے بعد 15 اپریل 2015 کی صبح اپنے خالق حقیقی سے جاملے۔