کراچی ......کراچی کے حلقہ این اے 246 میں ضمنی انتخاب کے لیے ووٹنگ جاری ہے۔213 پولنگ اسٹیشنوںپر ساڑھے تین لاکھ سے زائد ووٹرز اپنا حق رائے دہی استعمال کررہے ہیں ،پولنگ شام 5 بجے تک جاری رہے گی۔ رینجرز نے ایک کارروائی کے دوران دہلی اسکول کے پریزائیڈنگ افسر سمیت دو افراد کو گرفتار کرلیا گیا۔دونوں افراد جعلی ووٹ ڈالنے کی کوشش کررہے تھے۔ترجمان کا کہناہے کہ ملزم ریحان احمد کو 6 ماہ قید اور 5 ہزار روپے جرمانہ جبکہ ملزم ماجد علی کو 3ماہ جیل اور 5ہزار روپےجرمانہ عائد کیاگیا۔ 90 سالہ خاتون نے بھی ضمنی انتخاب میںووٹ ڈالا۔90 سالہ خاتون مسز عشرت کو ووٹ ڈالنے کیلئے ان کے بیٹے گود میں اٹھا کر فیڈرل بی ایریا کے پولنگ اسٹیشن پہنچے۔متحدہ قومی موومنٹ نے انتخابی عمل کو سست روی کا شکار قرار دیتے ہوئے پولنگ کا وقت تین گھنٹے بڑھانے کا مطالبہ کیا ہے، جبکہ عمران خان نے اسے متحدہ کی بہانے بازی قرار دیا ہے ، ادھر جماعت اسلامی نے بھی انتخابی عمل سے متعلق اپنی تحریری شکایات الیکشن کمیشن کو بھجوادی ہیں۔ ضمنی انتخاب میں پولنگ کا عمل سخت سیکورٹی میں جاری ہے۔ پولنگ اسٹیشنوںپر عوام ووٹ کاسٹ کرنے میں مصروف ہیں۔ پولنگ کے عمل میں ایک طرف لوگ انتظامات سے مطمئن ہیں تو کہیں کہیں ایک ہی کمرے میں ایک سے زیادہ پولنگ بوتھ بنائے جانے پر ناراض بھی ہیں۔ضمنی انتخاب کے موقع پر سیکیورٹی کے بھی سخت انتظامات ہيں لیکن حلقے میں ڈبل سواری پر عائد پابندی پر متحدہ کے امیدوار نے تحفظات کا اظہار کیا ہے ۔ کنور نوید کہتے ہیں کہ موٹر سائيکل شہر کی عام سواری ہے اور لوگ ووٹ کاسٹ کرنے میں اسے استعمال کرتے ہيں ۔متحدہ کے فیصل سبز واری نے بھی ایک کمرے میں ایک سے زيادہ پولنک بوتھ بنائے جانے پر کہاکہ اس سے پولنگ کا عمل سست روی کا شکار ہوگا۔پی ٹی آئی کے امیدوار عمران اسماعیل نے کہاکہ جو بھی امیدوار جیتے گا وہ اس کے گھر جاکر مبارکباد دیں گے لیکن انہیں امید ہے کہ وہی جیتیں گے۔جماعت اسلامی کے امیدوار راشد نسیم نے بھی سیکیورٹی انتظامات پر اطمینان کا اظہارکیا۔جماعت اسلامی نے این اے 246 میں مبینہ دھاندلی سے متعلق چیف الیکشن کمشنر کو تحریری شکایت دی ہے۔ کورکمانڈرکراچی لیفٹیننٹ جنرل نوید مختارکامختلف پولنگ اسٹیشنوں کا دورہ کیا، سکیورٹی اور پولنگ کے انتظامات کا جائزہ لیا۔ڈی جی رینجرز سندھ نے ڈی سی آفس کا دورہ کیا،ریٹرننگ افسران سے ملاقات کی۔آئی جی سندھ غلام حیدر جمالی کاکہنا ہے کہ انہوں نے اب تک جتنے پولنگ اسٹیشنوں کادورہ کیا وہاں پر انہیں کوئی شکایت نہیں ملی ۔این اے 246 پرضمنی انتخاب میں سیکیورٹی کے لیے رینجرز اور پولیس کے 9 ہزار جوان تعینات ہیں۔