نواب شاہ.......کتابوں سے دوستی اورعلم کی پیاس ترقی کے سفر میں آنے والی تمام رکاوٹوں کو دورکردیتی ہے۔ایسی ہی روشن مثال نواب شاہ کے شہری کی ہے جس نے غربت کے باوجودکتابوں سے رشتہ نہ توڑا۔5بچوں کے باپ نے انٹرامتحانات میں شرکت کی توڈویژن بھر میں دوسری پوزیشن حاصل کی۔

تعلیم کے لئے عمر کی کوئی قید نہیں ۔یہ سچ ثابت کیا ہے نواب شاہ کے تعلقہ دوڑ کے گاؤں جمعہ خان کے رہائشی محنت کش کسان علی حسن بروہی نے۔30سال کا علی حسن پانچ بچوں کا باپ ہے ۔وہ آٹھویں جماعت میں تھا جب والد کا انتقال ہوگیا ۔معاشی حالت آڑے آئے تو تعلیم ادھوری رہ گئی لیکن ہمت نہ ہاری ۔وہ کتابوں سےٹوٹا سلسلہ جوڑنے کی کوشش کرتارہا۔7سال بعد پھر سے انٹربورڈ میں رجسٹریشن کرائی ۔2015میں انٹرآرٹس کے پیپرز دیئے تو پورے حیدرآبادڈویژن میں 801نمبر لیکر دوسری پوزیشن حاصل کی ۔

علم کے پیاسے اس محنتی طالب علم کا کہنا ہے کہ اپنی عمر سے چھوٹے طالب علموں کے ساتھ کمرہ امتحان میں بیٹھنا کبھی برا نہیں لگا۔وہ اسی لگن اورشوق کے ساتھ آگے بھی پڑھتارہے گا اوربچوں کوبھی یہی نصیحت کرے گا۔

پڑھائی میں مدد دینے والے استاد اور دوست سکندرعلی رند نے کہا کہ علی حسن نے توقعات سے بڑھ کر نتائج دیئے۔ علی حسن بروہی نے انٹر میڈیٹ کے امتحانات میں دوسری پوزیشن حاصل کر کے یہ ثابت کردیا ہے کہ ترقی کے سفر میں آگر بڑھنے کے لئے غربت،، بلند حوصلوں کو پست نہیں کرسکتی۔