واشنگٹن........ فرانس کے دارالحکومت پیرس میں دہشتگردوں کے حملے کے بعد امریکا اور یورپ سمیت دنیا کے متعدد بڑے شہروں میں ہائی الرٹ کر دیا گیا ۔

امریکا نے دنیا بھرمیں اپنے شہریوں کو محتاط رہنے کی ہدایت کردی۔غیر ملکی میڈیا کے مطابق پیرس میں دہشتگردوں کے حملے کے بعد امریکا اور یورپ سمیت دنیا کے متعدد بڑے شہروں میں ہائی الرٹ کر دیا گیا ہے ۔

امریکا میں قانون نافذ کرنے والے ادارے ہائی الرٹ ہیں ۔واشنگٹن، نیویارک اور لاس اینجلس میں اہلکاروں کا گشت بڑھا دیا گیا ہے۔امریکی محکمہ خارجہ نے فرانس اور دیگر ملکوں میں موجود اپنے شہریوں کو محتاط رہنے اور کسی بھی ہنگامی صورتحال کی صورت میں امریکی سفارتخانے سے رابطےمیں رہنے کی ہدایت کردی۔

ادھر برطانیہ میں بھی سیکیورٹی سخت کرتے ہوئے ایم آئی فائیو کو ہر طرح کی صورت حال کیلئے تیار رہنے کی ہدایت کی گئی ہے جبکہ کینیڈا کے وزیراعظم نے بھی سیکیورٹی اداروں کو الرٹ رہنے کا حکم دیدیا ہے۔ سنگاپور کے وزیرداخلہ نے بھی ملک میں سیکیورٹی بڑھانے کے ساتھ ساتھ سرحدوں پر بھی نگرانی سخت کرنے کی ہدایت کی ہے۔