نیو یارک ......یہ کوئی اُڑن طشتری نہیں بلکہ امریکا میں تیار کیا جانیوالا غبارے نما دنیا کا سب سے بڑا طیارہ ہے۔ 3سال کی محنت کے بعدمکمل ہونیوالے اس دیوہیکل جہاز کی لمبائی 300 فٹ کے قریب ہے جو اب تک بننے والا دنیا کا سب سے بڑا جہاز ہے۔

ہیلی کاپٹراورہوائی جہاز کے امتزاج سے بنائی جانے والی اس اُڑن طشتری کو اگلے ماہ فضا میں ٹیسٹ فلائٹ کے لئے اُڑایا جائے گا ۔ایئرلینڈر نامی دیوہیکل جہاز کے انجن کی آزمائش گزشتہ برس اکتوبر میں کی جاچکی ہے تاہم آئندہ مہینے ایک بار پھر اس کی جانچ کی جائے گی جس میں اس مقصد کیلئے 13 لاکھ مربع فٹ ہیلیئم گیس بھری جائے گی۔

اپنی پہلی باقاعدہ پرواز میں ایئر لینڈر کو 112 کلومیٹر تک محدود رکھا جائے گا اور کامیابی کی صورت میں اس کے پہلے مکمل ماڈل کی تیاری کا کام شروع کر دیاجائیگا۔ ایک ارب ڈالرکی لاگت سے مکمل کئے جانیوالے اس منصوبے میں ایئرلینڈر زیادہ سے زیادہ 20 ہزار فٹ بلندی پر جاکر 144 کلومیٹر فی گھنٹہ کی رفتار سے اُڑے گااور اپنے ساتھ 10 ٹن سامان بھی لے جا سکے گا۔

بغیررن وے کے ٹیک آف اور لینڈ کرنے کی صلاحیت رکھنے والا یہ طیارہ سخت سے سخت موسمی حالات میںبھی پرواز کی صلاحیت رکھتا ہے جو نہ صرف شور کے بغیر پرواز کرنے کی صلاحیت رکھتا ہے بلکہ فضائی آلودگی سے بھی بچاؤ کا بہترین ذریعہ ہے۔