راولپنڈی… پاکستان نے سات سو کلومیٹر فاصلے تک مارکرنے والے کروز میزائل بابر کا ملٹی ٹیوب لانچر سے فائر کرنے کا کامیاب تجربہ کیا ہے، ایٹمی ہتھیار لے جانے کی صلاحیت والا یہ میزائل ، راڈار پر نظرنہ آنے والی اسٹیلتھ ٹیکنالوجی سے بھی لیس ہے ۔ آئی ایس پی آر کے مطابق مکمل طور پر ملکی ٹیکنالوجی سے تیار کردہ حتف سیون سیریز کے کروز میزائل بابر کو ملٹی ٹیوب لانچنگ گاڑی سے فائر کیا گیا، یہ میزائل کم بلندی پر پرواز کرتے ہوئے راڈار پر نظر نہ آنے والی اسٹیلتھ ٹیکنالوجی سے لیس ہے اور یہ سات سو کلومیٹر فاصلے تک ہدف کو انتہائی کامیابی اور مکمل درستگی کے ساتھ نشانہ بناسکتا ہے، ایٹمی اور روایتی ، دونوں طرز کے وارہیڈ لیجانے والے اس میزائل میں دوران پرواز ، مختلف نوعیت کی سطح زمین کو جانچ کر کم بلندی پر پرواز کرنے کے جدید ترین نظام نصب ہیں، میزائل کے تجربے کو چیئرمین جائنٹ چیفس آف اسٹاف کمیٹی جنرل خالدشمیم وائیں ، ڈی جی اسٹریٹجک پلانز ڈویژن لیفٹنٹ جنرل ریٹائرڈ خالد قدوائی، چیئرمین نیسکام عرفان برنی نے بھی دیکھا اور انہوں نے میزائل تیاری میں شامل سائنسدانوں انجینئرز کے کارکردگی کو سراہا، صدر مملکت اور وزیراعظم نے بھی اس میزائل تجربے پر مبارک باد دی ہے، آئی ایس پی آر کے مطابق میزائل تجربے سے ملک کی اسٹریٹجک ڈیٹرنس صلاحیت اور قومی سلامتی کو مزید مستحکم بنانے میں مدد ملی ہے۔