ایم کیو ایم کے رہنما فاروق ستار کے گھرکے محاصرے کے خلاف ایم کیو ایم کی جانب سے کاروبار اور ٹرانسپورٹ بند رکھنے کی اپیل کے باوجود شہر میں کاروبار زندگی رواں دواں ہے ۔ ڈی جی رینجرز سندھ نے کہا ہے کہ عوام بلا جواز ہڑتال کی کال پر کان نہ دھریں۔

فاروق ستار کے گھر کے محاصرہ کے خلاف ایم کیو ایم نے آج عوام سے کاروبار اور ٹرانسپورٹ بند رکھنے کی اپیل کی تھی ۔ تاہم اپیل کے باوجود کراچی میں دکانیں اور کاروباری مراکز معمول کے مطابق کھلے ہیں ، پبلک ٹرانسپورٹ بھی رواں دواں ہے۔

گلشن اقبال، صدر ٹاؤن، ملیر اور عزیز آباد سمیت مختلف علاقوں میں پٹرول پمپ اور سی این جی اسٹیشن کھلے ہوئے ہیں ، سحری کے اوقات میں فوڈ پوائنٹس بھی کھلے رہے۔

کورنگی ناصر جمپ کے قریب صبح سویرے نامعلوم افراد نے گاڑیوں پر پتھراؤ کیا اور دکانیں بند کروادیں تاہم رینجرز نے موقع پر پہنچ کر صورتحال پر قابو پالیا۔ اس وقت کورنگی کے مختلف پیٹرول پمپ پر رینجرز اہلکار تعینات ہیں اور علاقے میں پبلک ٹرانسپورٹ معمول کے مطابق رواں دواں ہے۔

ڈی جی رینجرز سندھ میجر جنرل بلال اکبر نے کاروبار اور ٹرانسپورٹ بند رکھنے کی اپیل پر رد عمل کا اظہار کرتے ہوئے کہا ہے کہ دکانیں بند کرانے والوں کے ساتھ سختی سے نمٹا جائے گا۔ کاروباری حضرات آزادی کے ساتھ کاروبار اور دکانیں کھولیں ۔

ان کا مزید کہنا تھا کہ عوام بلا خوف وخطر معمولات زندگی جاری رکھیں ۔ شر پسند عناصر کے خلاف سخت ایکشن لیا جائے گا ۔