بلوچستان کے ضلع لسبیلہ میں واقع شاہ نورانی کی درگاہ کے قریب دھماکا ہوا ہے۔ریسکیو ذرائع کے مطابق دھماکے میں 10افراد جاں بحق اور متعدد زخمی ہوگئے۔

ذرائع کے مطابق جس وقت دھماکا ہوا اس وقت وہاں دھمال جاری تھا اور500سے زائدافرادموقع پر موجود تھے، جاں بحق افراد کی لاشوں اور زخمیوں کو قریب واقع علاقائی اسپتالوں کے علاوہ کراچی کے سول اسپتال منتقل کیا جارہا ہے، واقعے میں ہلاکتوں میں اضافے کا خدشہ ہے، جاں بحق افراد میں عورتیں اور بچے بھی شامل ہیں۔

حب سے جیو نیوز کے نمائندے مشتاق کمبوہ کے مطابق شاہ نورانی کی درگاہ کراچی سے دوسو کلومیٹر دور ہے جبکہ دور ہونے کی وجہ سے وہاں قرب و جوار میں مواصلاتی ذرائع بھی نہیں ہیں۔

نمائندے کا یہ بھی کہنا ہے کہ وہاں قریبی واقع اسپتالوں میں طبی سہولتیں بھی میسر نہیںہیں ،فوری طبی امداد نہ ملنے کے باعث ہلاکتوں میں اضافے کا امکان ہے جب کہ امدادی کارروائیوں میں بھی دشواری پیش آرہی ہے۔

کراچی سے فیصل ایدھی بڑی تعداد میں ایمبولینسز لے کر امدادی کاموں کے لیے شاہ نورانی روانہ ہوگئے ہیں۔