ریاض اینڈی...قیمت پر کنٹرول ملتے ہی سی این جی مالکان مافیا بن گئے، پہلے جھٹکے میں ہی سی این جی کی قیمت ساڑھے تین روپے فی کلو تک بڑھادی گئی، سندھ میں سی این جی کی نئی قیمت ستر سے اکہتر روپے فی کلو ہو گئی۔

کراچی ٹرانسپورٹ اتحاد نے سی این جی کی قیمت میں اضافہ مسترد کر دیا۔

وزارت پیٹرولیم نے سندھ میں سی این جی کی قیمت 20دسمبر کو ڈی ریگولیٹ کرنے کا اعلامیہ جاری کیا تھا، اعلامیے کو نو دن گزرے ہیں اور مالکان نے سی این جی کی قیمت میں ساڑھے تین روپے اضافہ کردیا ہے۔

قیمت بڑھانے کا فیصلہ سی این جی کی تین ایسوسی ایشن نے مشترکہ اجلاس میں کیا، لیکن اس سلسلے میں کوئی باقائدہ اعلان نہیں کیا، اس لئے فیصلے سے زیادہ تر صارف بے خبر رہے۔

سی این جی مالکان کا کہنا ہےکہ پانچ سال سے قیمت نہیں بڑھائی گئی تھی جس کی وجہ سے انہیں نقصان ہورہا تھا، ڈی ریگولیٹ ہونے کے بعد مرضی کی قیمت پر بیچنے کا اختیار ہے لیکن سی این جی ہر جگہ ایک قیمت پر فروخت کی جارہی ہے جو شاید کارٹل بننے کا اشارہ ہے۔

قیمت میں اضافے کے بعد سی این جی صارف پیٹرول پر منتقل ہونے کا سوچ رہے ہیں۔

کراچی ٹرانسپورٹ اتحاد نے سی این جی کی قیمت میں مذکورہ اضافہ مسترد کردیا ہے، اتحاد کے چیئرمین ارشاد بخاری کا کہنا ہے کہ ہفتے کو ایسوسی ایشن کا اجلاس بلایا ہے، اضافہ واپس نہیں لیا گیا تو ٹرانسپوٹر ہڑتال کا اعلان کردیں گے۔

انہوں نے یہ بھی کہا کہ وزارت پیٹرولیم سی این جی کی قیمت ڈی ریگولیٹ کرنے کا فیصلہ واپس لے ۔

دوسری جانب کراچی میں پبلک ٹرانسپورٹ میں سفر کرنے والی خواتین نے بھی سی این جی کی قیمتوں میں اضافے پر تشویش کا اظہار کیا ہے کہ یہ اضافہ کہیں پبلک ٹرانسپورٹ کے کرایوں پر اثر انداز نہ ہو۔