کوئٹہ … کوئٹہ کے علاقے ہزار گنجی میں بم دھماکے میں پولیس اہلکاروں سمیت 6 افراد جاں بحق اور 30 سے زائد زخمی ہوگئے، متعدد افراد کی حالت تشویشناک بتائی جاتی ہے۔ پولیس کے مطابق ہزار گنجی میں ایران سے کوئٹہ آنے والی مسافر بس کے قریب دھماکا ہوا ہے جس میں 2 پولیس اہلکاروں سمیت 6 افراد جاں بحق ہوگئے۔ جیو نیوز کے نمائندہ ندیم کوثر کے مطابق پولیس نے بتایا ہے کہ دھماکے سے بس اور پولیس موبائل کو شدید نقصان پہنچا ہے اور پولیس اہلکاروں سمیت 30 سے زائد افراد زخمی ہوئے ہیں۔ ذرائع کے مطابق زائرین کی بس کوئٹہ کے علاقے ہزار گنجی پہنچی تو ریموٹ کنٹرول کے ذریعے دھماکا کردیا گیا جس کے نتیجے میں بس الٹ گئی اور پولیس موبائل کو بھی شدید نقصان پہنچا۔ ذرائع کا کہنا ہے کہ متعدد لاشیں اور زخمی افراد اب بھی بس میں موجود ہیں جنہیں نکالنے کی کوشش کی جارہی ہے۔ ذرائع کے مطابق دھماکے میں متعدد گاڑیوں کو بھی نقصان پہنچا ہے۔ ذرائع کا کہنا ہے کہ دھماکے کے وقت مسافر بس میں 40 سے 50 افراد موجود تھے۔ دھماکے میں ہلاک اور زخمی ہونے والوں کو بولان میڈیکل کمپلیکس منتقل کیا جارہا ہے جبکہ ہلاکتوں میں اضافے کا بھی خدشہ ہے۔ پولیس اور دیگر سیکیورٹی اداروں نے علاقے کو گھیرے میں لے لیا ہے۔واقعے کے بعد کوئٹہ کے اسپتالوں میں ایمرجنسی نافذ کردی۔