05 ستمبر ، 2017 
شریف خاندان اور اسحاق ڈار کے اثاثے منجمد کرنے کی سفارش مسترد
05 ستمبر ، 2017
اسلام آباد: چیرمین نیب نے شریف خاندان اور اسحاق ڈار کے اثاثے منجمد کرنے کی سفارش مسترد کردی۔
پاناما کیس کے فیصلے کی روشنی میں نیب لاہور اور راولپنڈی نے شریف خاندان اور اسحاق ڈار کے خلاف ریفرنسز تیار کرکے نیب ہیڈ کوارٹر بھجوائے تھے جن میں شریف خاندان اور اسحاق ڈار کے اثاثے منجمد کرنے کی سفارش کی گئی تھی جب کہ تمام افراد کے نام بھی ای سی ایل میں ڈالنے کا کہا گیا تھا۔
ذرائع کے مطابق قومی احتساب بیورو (نیب) کے چیرمین قمر زمان چوہدری نے نوازشریف، حسن، حسین، مریم نواز اور اسحاق ڈار کے اثاثے منجمد اور ان کے نام ای سی ایل میں ڈالنے کی سفارش بھی مسترد کردی ہے۔
ذرائع کا کہنا ہےکہ نیب ہیڈ کوارٹرز نے ڈائریکٹر جنرل نیب لاہور شہزاد سلیم کو اس حوالے سے خط بھی بھیج دیا ہے۔
واضح رہے کہ نیب لاہور نے ایون فیلڈ اپارٹمنٹس کیس میں شریف خاندان کے اثاثے منجمد اور نام ای سی ایل میں ڈالنے کی سفارش کی تھی جب کہ اسحاق ڈار کے خلاف آمدن سے زائد اثاثوں کا کیس ہے۔
سپریم کورٹ کی جانب سے نیب کو فیصلے کی تاریخ سے 6 ہفتوں کے اندر ریفرنس دائر کرنے کا حکم دیا گیا ہے جس کی مدت 8 ستمبر کو ختم ہورہی ہے۔
