پاکستان
Time 06 ستمبر ، 2017

’پاکستان میں دہشتگردی میں ملوث عناصر کی جڑیں افغانستان میں ہیں‘

اسلام آباد: امریکا میں پاکستان کے سفیر اعزاز چوہدری نے کہا ہے کہ پاکستان میں دہشت گردی میں ملوث عناصر کی جڑیں افغانستان میں ہیں۔

امریکی صدر نے جنوبی ایشیا اور افغانستان کے لیے نئی افغان پالیسی کا اعلان کرتے ہوئے پاکستان میں دہشت گردوں کی محفوظ پناہ گاہوں کا الزام عائد کیا تھا تاہم پاکستان نے امریکی صدر کے الزامات کو مسترد کردیا ہے جب کہ قومی اسمبلی نے بھی جنوبی ایشیا میں امریکا کی نئی پالیسی کے خلاف قرارداد منظور کی ہے۔

ڈونلڈ ٹرمپ کے بیان کے بعد پیدا ہونے والی صورتحال پر پاکستان میں سفیروں کی کانفرنس جاری ہے۔

جیونیوز کے مطابق امریکا میں پاکستان کے سفیر اعزاز چوہدری نے کہا ہے کہ پاکستان نے دہشت گردوں کے تمام محفوظ ٹھکانے ختم کردیئے ہیں اور اب افغانستان کی باری ہے کہ وہ محفوظ ٹھکانوں کا خاتمہ کرے کیونکہ پاکستان میں دہشت گردی میں ملوث عناصر کی جڑیں افغانستان میں ہیں۔

اعزاز چوہدری نے کہا کہ پاکستان افغانستان کے ساتھ مل کر کام کرنے کو تیار ہے اور نئی افغان پالیسی کے بعد بہت سے نکات بحث طلب ہیں۔

ان کا کہنا تھا کہ پاک امریکا تعلقات کو صرف افغانستان کے تناظر میں نہیں دیکھنا چاہیے کیوں کہ پاکستان نے دہشت گردی کے خلاف جنگ میں اربوں روپے کا نقصان اٹھایا۔ 

اعزاز چوہدری نے مزید کہا کہ سفیروں کی کانفرنس میں ہم نے نئی امریکی پالیسی اوردیگر امور پر بات کی ہے۔

مزید خبریں :