بھارتی حکمران جماعت بھی ’پدماوتی‘ تنازع میں کود پڑی

ہدایت کار سنجے لیلا بھنسالی کی فلم ’پدماوتی‘ کی نمائش کے تنازع میں بھارتی حکمراں جماعت بھارتیہ جنتا پارٹی بھی کود پڑی۔

دپیکا پڈوکون، رنویر سنگھ اور شاہد کپور کی فلم ’پدماوتی‘ کی نمائش جیسے جیسے قریب آرہی ہے تو فلم کے لیے مشکلات بڑھتی جارہی ہیں۔

فلم کی نمائش کی تاریخ یکم دسمبر ہے لیکن انتہا پسند شری راجپوت کرنی سینا کی جانب سے فلم کی نمائش کو روکنے کی دھمکیاں دی جارہی ہیں اور فلم کے خلاف احتجاج کا سلسلہ بھی جاری ہے۔

اب بھارتی حکمران جماعت بھارتیہ جنتا پارٹی نے الیکشن کمیشن، حکومت اور فلم سنسر بورڈ کو خط لکھ کر نمائش سے قبل فلم دکھانے کا مطالبہ کیا ہے۔

فلم ’پدماوتی‘ پر ریلیز سے پہلے ہی قینچی چل گئی

’پدماوتی‘ کی شوٹنگ ختم ہوچکی اور فلم 210 منٹ میں مکمل ہوئی ہے

بھارتیہ جنتا پارٹی گجرات کے ترجمان اور راجپوت کرنی سینا کے رہنما نے خط میں حکومت اور فلم سنسر بورڈ سے کہا ہے کہ اس فلم کے ذریعے ایک کمیونٹی کی دل آزاری ہوسکتی ہے لہذا کسی بھی تنازع سے بچنے کے لیے فلم کی نمائش سے قبل کرنی سینا کو دکھائی جائے اور ایسا کرنے سے فلم کی ریلیز میں مسائل نہیں ہوں گے۔

بی جے پی رہنما نے الیکشن کمیشن کو خط میں فلم کی ریلیز پر پابندی لگانے یا پھر گجرات کے انتخابات کے بعد نمائش کے لیے پیش کرنے کا مطالبہ کیا ہے۔

دوسری جانب بھارت کے علاوہ دنیا بھر میں فلم ’پدماوتی‘ کے ریلیز کے رائٹس ہالی وڈ کے مشہور اسٹوڈیو ’پیراماؤنٹ پکچرز‘ نے خرید لیے ہیں۔