اسلام آباد دھرنا: ایک شخص کی رٹ قائم ہے ریاست کی نہیں، سپریم کورٹ

اسلام آباد: سپریم کورٹ نے فیض آباد انٹرچینج پر مذہبی جماعت کے دھرنے سے متعلق حکومت سے 30 نومبر تک پیشرفت رپورٹ طلب کرلی۔ 

جسٹس مشیر عالم اور جسٹس قاضی فائز عیسیٰ پر مشتمل سپریم کورٹ کے دو رکنی بینچ نے دھرنے پر 21 نومبر کو لئے گئے نوٹس پر سماعت کی۔ 

اس موقع پر وزارت داخلہ اور وزارت دفاع کی جانب سے جوابات عدالت میں پیش کیے گئے جب کہ اٹارنی جنرل اشتر اوصاف بھی پیش ہوئے۔ 

سماعت کے دوران اٹارنی جنرل نے عدالت کو بتایا کہ دھرنا قائدین سے مذاکرات کے لیے مشائخ کو شامل کیا گیا ہے جس پر جسٹس قاضی فائز عیسیٰ نے کہا کہ کیا آپ کو اسلام کا نہیں پتا، پاکستان کو دلائل کی بنیاد پر بنایا گیا، جب دلیل کی بنیاد ہی ختم ہوجائے تو ڈنڈے کے زور پر صحیح بات اچھی نہیں لگتی۔

سپریم کورٹ نے اسلام آباد دھرنے کا نوٹس لے لیا

عدالت نے سیکرٹری دفاع اور سیکرٹری داخلہ سے تفصیلی رپورٹ طلب کرلی۔

جسٹس قاضی فائز عیسیٰ نے کہا کہ ایک شخص نے اسلام آباد اور راولپنڈی کے سنگھم کو بند کر رکھا ہے، ایک شخص کی رٹ قائم ہے لیکن ریاست کی نہیں۔

فاضل جج نے اٹارنی جنرل سے استفسار کیا کہ کیا آپ کے پاس تشدد کے علاوہ کوئی ایکشن پلان ہے جس پر اٹارنی جنرل نے مؤقف اختیار کیا کہ ہم اقدامات کر رہے ہیں لیکن کچھ ایسے اقدمات ہیں جن کی تشہیر نہیں کی جارہی۔

جسٹس قاضی فائز عیسیٰ نے کہا کہ انا اور تکبر سب سے بڑا گناہ ہے اور یہ سب انا کے لیے ہو رہا ہے، رحمت کاسلام کسی کے منہ سے کیوں نہیں نکل رہا، سب کے منہ سےگالم گلوچ نکل رہی ہے، ہم بھی پریشان ہوتے ہیں مگر گالم گلوچ نہیں کرتے، ہم نہیں چاہتے کہ مظاہرین پر گولیاں برسائی جائیں۔

انہوں نے کہا کہ لوگوں کو تکلیف ہو رہی ہے، ایک حوالہ دے دیں کہ راستہ بند کر دیا جائے، اسلام میں کہیں ایسا نہیں لکھا، یہ تو الٹا چور کوتوال کو ڈانٹے والی بات ہوگئی۔

جسٹس قاضی فائز عیسیٰ نے ریمارکس دیے کہ جب ریاست ختم ہوگی تو فیصلے سڑکوں پر ہوں گے، کل کوئی اور مسئلہ ہوگا تو کیا پھر شہر بند ہوجائیں گے۔

اسلام آباد میں 18ویں روز بھی دھرنا جاری، ہائیکورٹ میں کیس بغیر سماعت ملتوی

جسٹس شوکت عزیز صدیقی طبیعت کی ناسازی کے سبب کیس کی سماعت نہ کرسکے۔

فاضل جج نے کہا کہ 'دھرنے کی وجہ سے ایک بچہ وفات پا گیا، اس کا ذمہ دار کون ہے، ہم ان لوگوں سےگھبرا گئے جو اسلام کا نام لیتے ہیں لیکن عمل نہیں کرتے، بچے کی وفات سے میرا دل چکنا چور ہوگیا، میں خود کو ذمہ دار سمجھتا ہوں'۔

اٹارنی جنرل نے عدالت کو بتایا کہ چہلم حضرت امام حسین ؓ کا وقت تھا جب وہ مظاہرین فیض آباد انٹرچینج پر آکر بیٹھے، ہم نہیں چاہتے کہ خون خرابا ہو۔

جسٹس قاضی فائز عیسیٰ نے سوال کیا کہ آپ نے پرچے کتنے کاٹے جس پر اٹارنی جنرل نے بتایا کہ 18کیسز درج کیے اور 169 لوگ گرفتار ہیں۔

جسٹس قاضی فائز نے کہا کہ 'ہم عام ملک میں نہیں اسلامی ریاست میں رہتے ہیں، لگتا ہے مسلمانوں کا اسلامی ریاست میں رہنا مشکل ہوتا جا رہا ہے، بتائیں کیا حکم کریں، ذمے داری ریاست اور انتظامیہ کی ہے، ہم آپ کا کام نہیں کریں گے، پھر آپ ہی شکوہ کریں گے کہ ہمارے کام میں مداخلت ہوئی'۔

عدالت نے حکومت سے دھرنا مظاہرین کو فیض آباد انٹرچینج سے ہٹانے کے لئے پیشرفت رپورٹ 30 نومبر تک طلب کرتے ہوئے سماعت ملتوی کردی۔