پاکستان
Time 06 جنوری ، 2018

بلدیہ فیکٹری کیس: عدالت کا رؤف صدیقی کو شامل تفتیش کرنے کا حکم

—فوٹو:فائل

کراچی میں انسداد دہشت گردی کی عدالت نے سانحہ بلدیہ فیکٹری کیس میں ایم کیو ایم پاکستان کے رہنما رؤف صدیقی کو بھی بطور ملزم شامل تفتیش کرنے کا حکم دے دیا۔

سانحہ بلدیہ ٹاؤن فیکٹری کے مقدمے میں اہم پیش رفت ہوئی ہے اور انسداد دہشت گردی کی عدالت نے متحدہ قومی موومنٹ پاکستان کے رہنما اور رکن سندھ اسمبلی رؤف صدیقی کو شامل تفتیش کرنے کا حکم دیا ہے۔

ملزمان میں شامل کرنے کے عدالتی حکم کے بعد رؤف صدیقی احاطہ عدالت سے چلے گئے اور پولیس نے بھی عدالتی حکم کے باوجود رؤف صدیقی کو گرفتار کرنے سے گریز کیا۔

پولیس نے عدالت میں پیش کیے جانے والے چالان سے رؤف صدیقی کا نام ملزمان کی فہرست سے نکالا تھا لیکن رینجرز کے وکیل نے رؤف صدیقی کو ملزم بنانے کی درخواست کی تھی۔

کیس کی مزید سماعت 11جنوری تک ملتوی کردی گئی۔

سانحہ بلدیہ

کراچی کے علاقے بلدیہ ٹاؤن میں واقع بد نصیب فیکٹری علی انٹرپرائزز میں لگنے والی آگ کو پانچ سال گزر چکے ہیں،فیکٹری میں خوفناک آگ نے 260 لوگوں کو زندہ جلادیا تھا۔

11 ستمبر سال 2012 میں پیش آیا ایک ایسا خوفناک واقعہ جسے پاکستان کا نائن الیون بھی کہا جاتا ہے۔ حب ریور روڈ پر واقع علی انٹرپرائزز میں خطرناک آگ نے 260 جانیں نگل لیں۔

واقعے کا مقدمہ پہلے سائٹ بی تھانے میں فیکٹری مالکان، سائیٹ لمیٹڈ اور سرکاری اداروں کے خلاف درج کیا گیا۔ مختلف تحقیقاتی کمیٹیاں بھی بنیں اور جوڈیشل کمیشن بھی قائم کیا گیا لیکن کسی نتیجے پر نہیں پہنچا جاسکا نہ ہی کوئی گرفتاری عمل میں آئی۔

6 فروری 2015 کو عدالت میں رینجرز نے ایک رپورٹ جمع کروائی جس میں بتایا گیا کہ کلفٹن سے ناجائز اسلحہ کیس میں گرفتار ملزم رضوان قریشی نے دوران تفتیش انکشاف کیا کہ فیکٹری میں آگ لگی نہیں بلکہ لگائی گئی تھی اور اس کی وجہ فیکٹری مالکان سے مانگا گیا 20کروڑ روپے کا بھتہ تھا۔

ملزم رضوان قریشی کی جے آئی ٹی رپورٹ میں یہ بھی انکشاف کیا گیا کہ فیکٹری کو آگ لگانے میں سیاسی جماعت کے عہدیدار ملوث ہیں۔

حماد صدیقی نے بھتہ نہ دینے پر رحمٰن عرف بھولا کو آگ لگانے کا حکم دیا جس نے اپنے ساتھیوں کے ساتھ مل کر کیمیکل ایک ڈرم میں بھرا اور پھر فیکٹری کا مرکزی دروازہ بند کر کے آگ لگا دی گئی۔

تفتیش میں اس نئے موڑ کے بعد ڈی آئی جی سلطان خواجہ کی سربراہی میں ایک نئی جے آئی ٹی بنائی گئی جس نے دبئی میں جاکر فیکٹری مالکان سے تفتیش کی جنہوں نے اس بات کا اقرار کیا کہ ان سے بھتہ مانگا گیا تھا۔

سانحہ بلدیہ ٹاون کو 5 سال گزر جانے کے بعد بھی اصل مجرم قانون کی گرفت سے باہر ہیں، سانحہ بلدیہ فیکٹری کے مرکزی ملزم اور ایم کیو ایم کی تنظیمی کمیٹی کے سابق انچارچ حماد صدیقی کو دبئی سے گرفتار کیا جاچکا ہے۔ 

مزید خبریں :