ملک بھر میں آج یوم یکجہتی کشمیر کے تحت احتجاجی ریلیاں

مقبوضہ کشمیر میں جاری بھارتی قابض فوج کے ظلم و بربریت کے خلاف آج پاکستان میں یوم یکجہتی کشمیر منایا جارہا ہے۔

رواں ہفتے مقبوضہ کشمیر میں بھارتی فوج نے سرچ آپریشن کے نام پر اننت ناگ، شوپیاں اور پلوامہ میں معصوم لوگوں پر گولیاں چلائیں اور بعدازاں جنازوں میں شریک افراد پر بھی پیلٹ گنوں سے فائر کیے گئے، ان واقعات میں 20 بے گناہ کشمیری شہید جبکہ 100 سے زائد زخمی ہوچکے ہیں۔

بھارتی فوج کی ریاستی بربریت کے خلاف دنیا بھر میں اہل دل اور اہل درد بول اٹھے ہیں۔

وفاقی کابینہ کا خصوصی اجلاس، 6 اپریل کو یوم یکجہتی کشمیر منانے کا اعلان

مختلف ملکوں میں وفود بھی بھیجیں گے، بھارتی گجرات میں مسلمانوں کے قتل عام کی تاریخ اب مقبوضہ کشمیر میں دہرائی جارہی ہے، اجلاس کے بعد خواجہ آصف کی پریس کانفرنس

3 اپریل کو وزیراعظم شاہد خاقان عباسی کی سربراہی میں کشمیر کی موجودہ صورتحال کے حوالے سے وفاقی کابینہ کے ہنگامی اجلاس میں 6 اپریل کو یومِ یکجہتی کشمیر منانے کا اعلان کیا گیا تھا۔

اس سلسلے میں پاکستان میں بھی کشمیری بھائیوں کے حق میں آج ملک بھر میں احتجاجی ریلیاں نکالی گئیں۔

اسلام آباد میں جمعیت علمائے اسلام کے زیر اہتمام ریلی نکالی گئی جب کہ لاہور میں پی ٹی آئی سمیت مختلف تنظیموں کی جانب سے بھارت کے خلاف احتجاجی مظاہرے کیے گئے۔

کراچی میں جماعت اسلامی کے تحت جمعہ کی نماز کے بعد بیت المکرم مسجد کے سامنے مظاہرہ کیا جس میں نائب امیر جماعت اسلامی اسد اللہ بھٹوسمیت اہم رہنماؤں نے شرکت کی۔

جماعت اسلامی کے رہنما اسد اللہ بھٹو نے کہاکہ امیرجماعت اسلامی سراج الحق کی ہدایت پریوم یکجہتی کشمیر منارہےہیں، کشمیر ہو یا فلسطین، ہر جگہ مسلمانوں پرمظالم کیےجارہےہیں۔

کراچی میں سنی ایکشن کمیٹی کے زیراہتمام کشمیریوں سے اظہار یکجہتی کے لیے مظاہرہ کیا گیا جس میں شرکا نے مقبوضہ کشمیر میں بھارتی مظالم کی مذمت کی۔

پشاور میں بھی مختلف سیاسی و سماجی تنظیموں نے بھارتی مظالم کے خلاف ریلیاں نکالیں جس میں سیکڑوں افراد نے شرکت کی۔