25 جون ، 2018 
سیف علی خان نے بیٹے تیمور کو ’غنڈہ‘ قرار دے دیا
25 جون ، 2018
بالی وڈ اداکار سیف علی خان نے اپنے بیٹے تیمور علی خان کو غنڈہ قرار دے دیا۔
سیف علی خان اور کرینہ کپور کے صاحبزادے تیمور علی خان پیدائش کے بعد سے ہی شہ سرخیوں میں ہیں۔
تیمور علی خان کی شہرت اب اپنے والدین سے زیادہ ہے ، یہی وجہ ہے کہ میڈیا کے کیمرے ان کا پیچھا کرتے رہتے ہیں جس سے ان کے گھر والے خصوصاً دادی پریشان ہیں۔
تیمور علی خان کی عمر جیسے جیسے بڑھتی جارہی ہے تو ان کی شرارتوں میں بھی اضافہ ہوگیا ہے اور اسی وجہ سے ان کے پاپا سیف علی خان پریشان بھی ہیں۔
اپنے انٹرویو میں چھوٹے نواب سیف علی خان کا کہنا تھا کہ ان کی بہن سوہا علی خان کی بیٹی انایا اور تیمور گھر میں اکثر ایک ساتھ کھیلتے ہیں، انایا چھوٹی اور نازک سی ہے لیکن تیمور بہت زیادہ شرارتی ہے۔
انہوں نے بتایا کہ جب دونوں گھر میں ایک ساتھ کھیل رہے ہوتے ہیں تو ان کے آس پاس لوگ موجود ہوتے ہیں، لیکن تیمور غنڈہ ہے اور اس کی جانب سے انایا کے بال کھینچنے کا ڈر ہمیشہ ہی لگا رہتا ہے۔
سیف نے امید کا اظہار کیا کہ تیمور آئندہ انایا کے بال نہیں نوچے گا۔
یاد رہے کہ تیمور کی پھوپھی سوہا علی خان بھی اپنے انٹرویو میں اس کی شرارتوں کا پردہ فاش کرچکی ہیں اور امید کا بھی اظہار کیا ہے کہ دونوں کزنز مستقبل میں اچھے دوست بنیں گے۔
