Time 30 اگست ، 2018
پاکستان

اس بار حکومت اور فوج ایک پیج پر ہے، کتاب بھی ایک ہے،فواد چوہدری

وزیر اعظم کو دہشت گردی کے خلاف جنگ سے متعلق بریفنگ دی گئی، موجودہ حکومت کی تمام پالیسیوں پراداروں کی رائے شامل ہوگی، فواد چوہدری—فوٹو: آئی ایس پی آر

وزیراعظم عمران خان کے ہمراہ وفاقی کابینہ کے ارکان کے دورہ جی ایچ کیو کے حوالے سے گفتگو کرتے ہوئے وزیر اطلاعات فواد چوہدری نے کہا کہ وزیر اعظم اور آرمی چیف کے درمیان ہونے والی ملاقات مثبت رہی۔

انہوں نے کہا کہ وزیر اعظم کو دہشت گردی کے خلاف جنگ سے متعلق بریفنگ دی گئی، موجودہ حکومت کی تمام پالیسیوں پراداروں کی رائے شامل ہوگی۔

وزیر اطلاعات فواد چوہدری نے مزید کہا کہ عمران خان جو بھی کریں گے وہ پاکستان کے لیے ہوگا، اس بار حکومت اور فوج ایک پیج پر ہے اور کتاب بھی ایک ہے۔

فواد چوہدری نے یہ بھی کہا کہ امریکا خود الجھن کا شکار ہے کہ وہ افغانستان سے نکلنا یا موجود رہنا چاہتا ہے، امریکی وزیرخارجہ پاکستان آرہے ہیں، دیکھتے ہیں وہ کتنی کلیئرسوچ کے ساتھ آرہے ہیں۔

فیاض الحسن چوہان دل کے بہت اچھے ہیں، فواد چوہدری

تحریک انصاف کے رہنما اور وفاقی وزیر اطلاعات فواد چوہدری کا کہنا ہے کہ پنجاب کے وزیراطلاعات فیاض الحسن چوہان دل کے بہت اچھے ہیں۔

وزیر اطلاعات پنجاب فیاض الحسن چوہان کی بدکلامی اور نازیبا کلمات کی ادائیگی کی متعدد ویڈیوز سوشل میڈیا پر وائرل ہیں اور انہیں اہم عہدہ سونپنے پر تحریک انصاف پر شدید تنقید بھی کی جارہی ہے۔

تاہم جیو نیوز کے پروگرام 'آج شاہ زیب خانزادہ کے ساتھ' میں گفتگو کرتے ہوئے وفاقی وزیر اطلاعات فواد چوہدری نے کہا کہ فیاض چوہان کو پارٹی کی طرف سے پیغام دے دیا گیا ہے، فیاض چوہان دل کے بہت اچھے ہیں، فیاض چوہان کارکردگی بھی دکھائیں گے۔

فواد چوہدری نے کہا کہ فیاض چوہان کی باتیں پارٹی کا مؤقف نہیں، انہیں ایسی بات نہیں کرنی چاہیے تھی۔

مزید خبریں :