جنسی ہراساں کرنے کا الزام: نانا پاٹیکر نے تنوشری دتہ کو قانونی نوٹس بھجوادیا

بھارتی اداکار نانا پاٹیکر نے جنسی ہراساں کیے جانے کا الزام لگانے پر اداکارہ تنو شری دتہ کو قانونی نوٹس بھجوا دیا۔

نانا پاٹیکر کے وکیل رجیندرا شرودکر کے مطابق تنوشری دتہ کے لگائے جانے والے تمام الزامات جھوٹے اور بے بنیاد ہیں جنہیں وہ مسترد کرتے ہیں۔

نانا پاٹیکر نے تنوشری سے معافی اور غلطی تسلیم کرنے کے اعتراف کا مطالبہ بھی کیا۔

اداکار کے وکیل کے مطابق اگر وہ ایسا نہیں کرتی ہیں تو ان کے خلاف ہتک عزت کی کارروائی کی جائے گی۔

نانا پاٹیکر نے فلم کی شوٹنگ کے دوران ہراساں کیا، اداکارہ تنوشری دتہ کا انکشاف

تنوشری دتہ کے مطابق نانا پاٹیکر کی حقیقت سے ہر کوئی واقف ہے لیکن کسی کی اتنی ہمت نہیں کہ وہ ان کی سچائی سب کے سامنے لائے۔

دوسری جانب بھارتی میڈیا ایجنسی اے این آئی کے مطابق اداکارہ تنوشری دتہ کا کہنا ہے کہ انہیں نانا پاٹیکر کی جانب سے کوئی بھی قانونی نوٹس موصول نہیں ہوا ہے، یہ دھمکیاں اس لیے دی جارہی ہیں تاکہ مجھ جیسے باقی افراد ڈر جائیں اور سامنے نہ آسکیں‘۔

اداکارہ نے قانونی نوٹس کی تردید کرتے ہوئے مزید کہا کہ ’جس کسی کے بھی ساتھ ایسا ہوا ہے انہیں اس قسم کی چالوں سے خوفزدہ نہیں ہونا چاہیے، عوام ان کے ساتھ ہے‘۔

واضح رہے کہ حال ہی میں تنوشری دتہ نے بھارتی میڈیا کو ایک انٹرویو دیتے ہوئے نانا پاٹیکر پر 2008 میں ایک فلم کی شوٹنگ کے دوران جنسی ہراساں کیے جانے کا الزام عائد کیا تھا۔

ان کا کہنا تھا، ’میں نام لے کر بتانا چاہتی ہوں کہ نانا پاٹیکر فلم کی شوٹنگ کے پہلے ہی دن میرے ساتھ غلط طرح سے پیش آئے تھے، یہاں تک کہ میرے سولو گانے کی شوٹنگ کے وقت بھی انہوں نے ساتھ ڈانس کرنے کی شرط رکھی‘۔

نانا پاٹیکر نے تنوشری دتہ کی جانب سے جنسی ہراساں کرنے کا الزام مسترد کردیا

تنوشری دتہ نے ایک حالیہ انٹرویو میں نانا پاٹیکر پر 2008 میں ایک فلم کی شوٹنگ کے دوران جنسی ہراساں کیے جانے کا الزام عائد کیا تھا۔

تنوشری دتہ نے انٹرویو کے دوران بتایا کہ نانا پاٹیکر نے زور زبردستی کرکے ان کے ساتھ ڈانس کیا جس کی شکایت انہوں نے فلم کے پروڈیوسر اور ڈائریکٹر سے بھی کی لیکن دونوں نے کان نہیں دھرے۔

اداکارہ کا یہ بھی کہنا تھا کہ نانا پاٹیکر دیگر اداکاراؤں کو بھی ہراساں کر چکے ہیں اور ان کے ساتھ غیر اخلاقی طریقے سے بھی پیش آچکے ہیں۔

تاہم تنوشری دتہ کی جانب سے جنسی ہراساں کرنے کے الزام کو نانا پاٹیکر نے مسترد کردیا تھا۔