پاکستان دہشتگردوں کی مالی معاونت روکنے کے تمام اقدامات کرچکا: ایف اے ٹی ایف کو بریفنگ

اسلام آباد: پاکستان نے فنانشل ایکشن ٹاسک فورس  (ایف اے ٹی ایف) کو آگاہ کیا ہےکہ اقوام متحدہ کی ہدایات کے مطابق دہشت گردوں کی مالی معاونت روکنے کے تمام اقدامات کرچکے ہیں۔

اسلام آباد میں شروع ہونے والے یہ مذاکرات 19 اکتوبر تک جاری رہیں گے اور اس دوران یہ وفد چاروں صوبوں کا بھی دورہ کرے گا۔

وفد 21 اکتوبر کو اپنی رپورٹ ایف اے ٹی ایف کو پیش کرے گا۔

مذاکرات کے پہلے روز ایف اے ٹی ایف کے ایشیا پیسیفک گروپ میں امریکہ، برطانیہ، چین، ترکی، مالدیپ اور انڈونیشیا کے تکنیکی ماہرین شامل ہوئے جبکہ پاکستان کی طر ف سے فنانشل مانیٹرنگ یونٹ، ایف آئی اے، نیب،  ایف بی آر ، ایس ای سی پی اور دفتر خارجہ کے حکام علیحدہ علیحدہ شریک ہوئے۔

ذرائع کے مطابق وفد کو حکومت پاکستان کی طرف سے ایف اے ٹی ایف کی جانب سے پیش کردہ 27 مطالبات پر عمل درآمد کے بارے بریفنگ دی گئی۔

پاکستان نے دہشت گردوں کی مالی معاونت ، منی لانڈرنگ ، اسمگلنگ اور رقوم کی غیر قانونی ترسیل روکنے کیلئے اٹھائے جانے و الے اقدامات کے بارے وفد کے سوالوں کے جوابات دیئے۔پاکستانی حکام نے وفد کو بتایا کہ اس سلسلے میں قوانین میں ترامیم کر دی گئی ہیں کچھ ترامیم کی جا رہی ہیں جو اسی سال کے دوران مکمل ہو جائیں گی۔

مذاکرات کے دوران ایف اے ٹی ایف کی ٹیم پاکستان کے دہشت گردوں کی مالی معاونت روکنے کے انتظامی و قانونی اقدامات اور اداروں کی جانب سے ان پر عملدرآمد کا جائزہ لےگی اور 21 اکتوبر تک پاکستان کو گرے لسٹ سے نکالنے یا بلیک لسٹ کرنے کی سفارشات مرتب کرے گی۔

ذرائع کے مطابق پاکستان نے منی لانڈرنگ قوانین میں مجوزہ ترامیم سے وفد کو آگاہ کیا اور مؤقف اپنایا کہ منی لانڈرنگ میں ملوث افراد کی سزائیں بڑھائی جائیں گی۔

ذرائع نے بتایا کہ پاکستانی وفد کی جانب سے ایف اے ٹی ایف کو بریفنگ میں بتایا گیا کہ مجوزہ ترامیم کی منظوری کے بعد پاکستان دوسرے ممالک کو درکار معلومات فراہم کرے گا، ترامیم کابینہ سےمنظوری کے بعد پارلیمنٹ سے منظور کرائی جائیں گی اور ان ترامیم پر اسی سال عملدرآمد ہوگا۔

بریفنگ میں مزید بتایا گیا کہ پاکستان اقوام متحدہ کی ہدایات کے مطابق دہشت گردوں کی مالی معاونت روکنے کے تمام اقدامات کرچکا، سلامتی کونسل کے رولز 1276,1373 پر پاکستان عملدرآمد یقینی بنائے۔

بہتر کارکردگی پر ہی ایف اے ٹی ایف کی گرے لسٹ سے نکل سکتے ہیں: ترجمان دفتر خارجہ

پاکستان اور ایف اے ٹی ایف میں ایکشن پلان پر عملدرآمد پر بات چیت ہو رہی ہے، گرے لسٹ میں رہتے ہوئے ہمیں اس ایکشن پلان پر عملدرآمد کو یقینی بنانا ہوگا، ڈاکٹر فیصل

واضح رہے کہ گزشتہ ماہ ایشیاء پیسفک گروپ کے چند حکام نے پاکستان کا دورہ کرکے فائنل مذاکرات کے ایجنڈے کو حتمی شکل دی تھی، جس کے بعد ایف اے ٹی ایف کی سفارشات کی روشنی میں حکومت نے اقدامات مکمل کرلیے ہیں۔

ذرائع کے مطابق حکومت نے ایف اے ٹی ایف کی سفارشات پر ریگولیشنز 2018 میں ترامیم کی منظوری دے دی ہے جب کہ اینٹی منی لانڈرنگ اور دہشت گردوں کی مالی معاونت روکنے سے متعلق ریگولیشنز میں بھی ترامیم کی گئی ہیں۔

علاوہ ازیں حکومت کی جانب سے منی ٹریل کی نشاندہی کے لیے مختلف تجاویز کی بھی منظوری دی گئی ہے اور مبینہ مشکوک مالی سرگرمیوں میں ملوث الرحمان ٹرسٹ نامی تنظیم کو بھی کالعدم قرار دیا جاچکا ہے۔

فنانشل ایکشن ٹاسک فورس

فنانشل ایکشن ٹاسک فورس کے ارکان کی تعداد 37 ہے جس میں امریکا، برطانیہ، چین، بھارت اور ترکی سمیت 25 ممالک، خیلج تعاون کونسل اور یورپی کمیشن شامل ہیں۔

فنانشل ایکشن ٹاسک فورس اجلاس: پاکستان کو گرے لسٹ میں شامل رکھنے کا فیصلہ

نگران وزیر خزانہ ڈاکٹر شمشاد اختر کی قیادت میں وفد نے اجلاس کو اینٹی منی لانڈرنگ، دہشت گردی کی مالی معاونت روکنے اور کالعدم تنظیموں اور دیگر گروہوں کے خلاف کیے گئے اقدامات سے آگاہ کیا۔

اس تنظیم کی بنیادی ذمہ داریاں عالمی سطح پر منی لانڈرنگ اور دہشت گردوں کی مالی معاونت روکنے کے لیے اقدامات کرنا ہیں۔

عالمی واچ لسٹ میں پاکستان کا نام شامل ہونے سے اسے عالمی امداد، قرضوں اور سرمایہ کاری کی سخت نگرانی سے گزرنا ہوگا جس سے بیرونی سرمایہ کاری متاثر ہوگی اور ملکی معیشت پر منفی اثرات مرتب ہوں گے۔

خیال رہے کہ اس سے قبل 2012 سے 2015 تک بھی پاکستان ایف اے ٹی ایف کی واچ لسٹ میں شامل تھا۔