ملتان …ملتان میں حسین آگاہی چوک کے قریب آتش بازی کے گودام میں دھماکے سے 4افراد ہلاک اور خواتین اور بچوں سمیت 10افراد زخمی ہوگئے۔دھماکا حسین آگاہی چوک کے قریب کپ بازار کبوتر منڈی میں آج صبح ایک مکان میں ہواجہاں آتش بازی کا سامان رکھا ہوا تھا۔ دھماکے کی آواز دور تک سنی گئی۔ یہ اتنا شدید تھا کہ قریب ہی موجود تین منزلہ عمارت گر گئی اور کئی عمارتوں کو نقصان پہنچا۔زخمیوں کو نشتر اسپتال منتقل کردیاگیا ہے۔عینی شاہدین کا کہنا ہے کہ ملتان سمیت پنجاب بھر میں آتش بازی کے سامان پر پابندی عائد کی جائے۔سی پی او عامر ذوالفقار کے مطابق جس عمارت میں دھماکا ہوا اس کی مالک پروین بی بی اور اس کے شوہر کے خلاف آتش بازی کا سامان رکھنے کا مقدمہ پہلے ہی درج ہے۔ ناقص سیکیورٹی پر ایس ایچ او تھانہ کپ کو معطل اور ڈی ایس پی حرم گیٹ صادق مہدی کے خلاف محکمانہ تحقیقات کی جارہی ہیں۔دھماکے کے بعد عمارت میں لگی آگ پر ابھی تک قابو نہیں پایاجاسکا ہے۔دھماکے کی جگہ اب بھی چھوٹے چھوٹے دھماکے ہورہے ہیں۔اورتیز ہواوٴں کی وجہ سے آگ بجھانے میں مشکلات کا سامنا ہے۔