22 اپریل ، 2019 
امریکا کی ایرانی تیل درآمد کرنے پر چین اور بھارت سمیت کئی ممالک کو تنبیہ
22 اپریل ، 2019
واشنگٹن: امریکا نے ایرانی تیل درآمد کرنے پر چین، بھارت اور ترکی سمیت کئی ممالک کو انتباہ جاری کردیا۔
امریکا نے گزشتہ سال 5 نومبر سے ایرانی تیل کی فروخت پر پابندی عائد کی تھی اور ایران سے تیل خریدنے والے کئی ممالک کو 6 ماہ کا وقت دیا تھا اور یہ چھوٹ 2 مئی کو ختم ہو رہی ہے۔
تاہم اب امریکا نے ایرانی تیل کی فروخت پر پابندی کا مکمل نفاذ کرتے ہوئے چین اور بھارت سمیت کئی ممالک کو انتباہ جاری کیا ہے۔
امریکی وزیرخارجہ مائیک پومپیو کے مطابق ایران سے تیل خریدنے والے ممالک کو دی گئی امریکی چھوٹ ختم کی جا رہی ہے اور ایران پر دباؤ بڑھایا جارہا ہے۔
انہوں نے کہا کہ امریکا نے اتحادیوں کو متبادل ذرائع سے تیل حاصل کرنے کی ترغیب دی ہے اور اس حوالے ان کی مدد بھی کی جائے گی۔
دوسری جانب امریکی صدر ڈونلڈ ٹرمپ نے بھی ٹوئٹ میں سعودی عرب اور اوپیک تنظیم میں شامل دیگر ممالک کو ایرانی تیل پر پابندی کی صورت میں تیل کی مطلوبہ پیدوار برقرار رکھنے میں تعاون کا کہا ہے۔
ایران پر عائد امریکی پابندیوں کے باوجود جاپان، جنوبی کوریا، ترکی، چین اور بھارت ایران سے تیل کی خریداری جاری رکھے ہوئے تھے تاہم اب امریکا کی جانب سے ان ممالک کو کہا جا رہا ہے کہ وہ ایرانی تیل کی خریداری روک دیں بصورت دیگر انہیں پابندیوں کا سامنا ہوگا۔
مزید خبریں :
ڈونلڈ ٹرمپ نے اسکاٹ بیسنٹ کو وزیر خزانہ نامزد کردیا
23 نومبر ، 2024
غزہ پر اسرائیلی بمباری سے مزید 38 فلسطینی شہید
23 نومبر ، 2024
مزید 2 ممالک آئندہ سال شینگن ممالک کا حصہ بننے کو تیار
22 نومبر ، 2024
حزب اللہ کے راکٹ حملے میں اسرائیلی شہری ہلاک
22 نومبر ، 2024
