20 اگست ، 2019 
مسئلہ کشمیر پاکستان اور بھارت کو باہمی طور پر حل کرنا ہے، برطانوی وزیراعظم
20 اگست ، 2019
لندن: برطانوی وزیراعظم بورس جانسن کا کہنا ہے کہ مسئلہ کشمیر پاکستان اور بھارت کو باہمی طور پر حل کرنا ہے اور اس کیلئے مذاکرات ہی بہترین راستہ ہے۔
برطانوی وزیراعظم کے ترجمان کی جانب سے جاری بیان کے مطابق بورس جانسن اور بھارتی وزیراعظم نریندر مودی کے درمیان ٹیلی فونک گفتگو ہوئی۔
ترجمان کے مطابق نریندر مودی نے بورس جانسن کو وزیراعظم کا عہدہ سنبھالنے پر مبارکباد دی۔ دونوں رہنماؤں کے درمیان ہونے والی بات چیت میں باہمی دلچسپی کے امور اور خطے کی صورتحال پر تبادلہ خیال کیا گیا۔
ترجمان نے کہا کہ بھارتی وزیراعظم نے گفتگو کے دوران مقبوضہ کشمیر کی موجودہ صورتحال کا تذکرہ کیا جس پر برطانوی وزیراعظم نے واضح طور پر کہا کہ برطانیہ سمجھتا ہے کہ مسئلہ کشمیر پاکستان اور بھارت کو باہمی طور پر حل کرنا ہے اور برطانیہ اس مسئلے کے حل کے لیے مذاکرات کی اہمیت پر زور دیتا ہے۔
خیال رہے کہ گزشتہ روز امریکی صدر ڈونلڈ ٹرمپ کی بھی بھارتی وزیراعظم نریندر مودی اور پاکستانی وزیراعظم عمران خان سے ٹیلی فونک گفتگو ہوئی تھی۔
ڈونلڈ ٹرمپ نے بتایا کہ ان کی دونوں رہنماؤں کے ساتھ کشمیر کے معاملے پر تناؤ اور کشیدگی کم کرنے کے اہم ترین موضوع پر گفتگو ہوئی، صورتحال بڑی تشویش ناک ہے مگر بات چیت بڑی اچھی رہی۔
مزید خبریں :
ڈونلڈ ٹرمپ نے اسکاٹ بیسنٹ کو وزیر خزانہ نامزد کردیا
23 نومبر ، 2024
غزہ پر اسرائیلی بمباری سے مزید 38 فلسطینی شہید
23 نومبر ، 2024
