امریکا کا مقبوضہ کشمیر میں انسانی حقوق کی خلاف ورزیوں اور گرفتاریوں پر تشویش کا اظہار
08 ستمبر ، 2019
امریکا نے مقبوضہ کشمیر میں بڑے پیمانے پر گرفتاریوں پر تشویش کا اظہار کرتے ہوئے بھارت سے مطالبہ کیا ہے کہ مقبوضہ وادی میں انسانی حقوق کا احترام کیا جائے۔
کشمیر میڈیا سروس کے مطابق امریکی حکام نے بھارت پر زور دیا ہے کہ مقبوضہ کشمیر کی مقامی قیادت سے مذاکرات کا دوبارہ سے آغاز کیا جائے۔
امریکی محکمہ خارجہ کی ترجمان مورگن آرٹیگس نے اپنے ایک بیان میں کہا ہے کہ مقبوضہ کشمیر میں تاجروں اور مقامی سیاسی رہماؤں کی بڑے پیمانے پر گرفتاریوں اور کشمیریوں پر عائد کی جانے والی پابندیوں پر امریکا کو شدید تشویش ہے۔
مورگن آرٹیگس نے مزید کہا کہ ہمیں مقبوضہ کشمیر میں انٹرنیٹ اور موبائل فون سروس کی بندش پر بھی تشویش ہے۔
انہوں نے کہا مقبوضہ کشمیر کی انتظامیہ پر زور دیا کہ وادی میں انٹرنیٹ اور موبائل فون سروس کو بحال کیا جائے، ہم چاہتے ہیں کہ بھارت مقبوضہ کشمیر کی مقامی سیاسی قیادت سے مذاکرات کا آغاز کرے اور اپنے وعدے کے مطابق جلد از جلد انتخابی شیڈول کا اعلان کرے۔
خیال رہے کہ اس سے قبل بھی امریکا مقبوضہ کشمیر میں انسانی حقوق کی خلاف ورزیوں پر تشویش کا اظہار کر چکا ہے۔
