’مذاکرات کیلئے ہمارے دروازے کھلے ہیں‘، طالبان کا امریکی صدر کو پیغام

افغان طالبان نے امریکا کو ایک بار پھر مذاکرات کی پیشکش کرتے ہوئے کہا ہےکہ اگر امریکی صدر ٹرمپ مستقبل میں امن مذاکرات دوبارہ بحال کرنا چاہیں تو ان کے دروازے کھلے ہیں۔

بی بی سی کو دیے گئے انٹرویو میں طالبان کے امن مذاکرات کے سربراہ شیر محمد عباس ستانکزئی نے افغانستان میں امن کے لیے صرف مذاکرات کو ہی واحد راستہ قرار دیا۔

امریکی صدر نے طالبان کے ساتھ امن مذاکرات منسوخ کر دیئے

افغان صدر اور طالبان رہنماؤں کے ساتھ آج کیمپ ڈیوڈ میں ہونے والی ملاقاتیں بھی منسوخ کر دی ہیں: ڈونلڈ ٹرمپ

انہوں نے امریکا کے خدشات کو مسترد کرتے ہوئے کہا کہ طالبان نے کچھ غلط نہیں کیا۔

شیر محمد عباس کا کہنا تھا کہ امریکیوں نے ہزاروں طالبان کو قتل کیا لیکن اسی دوران اگر ایک بھی امریکی فوجی کو قتل کردیا جاتا ہے تو اس کا یہ مطلب نہیں کہ انہیں اس طرح کا رد عمل دینا چاہیے کیونکہ دونوں طرف سے سیز فائر نہیں ہے۔

انہوں  نے کہا کہ ہماری طرف سے مذاکرات کے دروازے اب بھی کھلے ہیں لہٰذا ہم امید کرتے ہیں کہ دوسری طرف سے بھی مذاکرات کے حوالے سے کیے گئے فیصلے پر دوبارہ غور ہوگا۔

طالبان رہنما کا کہنا تھا کہ طالبان اور غیر ملکی افواج کے درمیان سیز فائر پر عملدرآمد معاہدے پر دستخط کے بعد بھی ہوگا تاہم اس وقت طالبان اور افغان حکومت کے درمیان کوئی سیز فائر نہیں ہے۔

شیر محمد عباس نے تصدیق کی کہ طالبان نے امن مذاکرات میں مدد کے لیے روس اور چین تک رسائی حاصل کرلی تھی۔

امریکا اپنے فوجیوں کی خیر چاہتا ہے تو معاہدہ کر لے: افغان طالبان کا پیغام

دوسرے افغانوں کی طرح ہم بھی امریکا کے ساتھ مذاکرات کرنا چاہتے ہیں، اگر ان کے ساتھ فائر بندی کا معاہدہ ہو جاتا ہے تو ان کے فوجیوں پر حملے نہیں ہوں گے: ترجمان طالبان

دوسری جانب افغان طالبان رہنما کے بیان پر افغان مشیر سلامتی ڈاکٹر حمداللہ کاکہنا تھا کہ طالبان کی دھمکانے کی پالیسی کامیاب نہیں ہوگی، ایک ہی راستہ ہے وہ افغان حکومت سے مذاکرات سے ہی ملک میں امن دیکھ سکتے ہیں۔

واضح رہےکہ افغان طالبان اور امریکا کے درمیان امن معاہدے کے بعد تقریباً معاملات طے پاچکے تھے جس کی تصدیق زلمے خلیل زاد کی جانب سے بھی کی گئی تھی تاہم کابل دھماکوں کے بعد امریکی صدر نے طالبان سے مذاکرات کا عمل منسوخ کردیا۔