03 اکتوبر ، 2019 
امریکا مذاکرات میں واپس آئے تو اُسے خوش آمدید کہیں گے: افغان طالبان
03 اکتوبر ، 2019
افغان طالبان کا کہنا ہے کہ امریکا کے ساتھ معاہدہ مکمل ہو چکا ہے اور ہم آج بھی اس معاہدے پر قائم ہیں۔
افغان طالبان کا 12 رکنی وفد ملا عبدالغنی برادر کی قیادت میں پاکستان کے دورے پر موجود ہے جہاں انہوں نے پہلے وزارت خارجہ میں پاکستانی حکام سے ملاقات کی اور پھر وزیراعظم ہاؤس میں وزیراعظم عمران خان سے بھی ملاقات کی۔
جیو نیوز سے بات کرتے ہوئے افغان طالبان کے ترجمان سہیل شاہین کا کہنا تھا کہ امریکا کے ساتھ امن مذاکرات کی بحالی پر تیار ہیں، امریکا مذاکرات میں واپس آئے تو اُسے خوش آمدید کہیں گے۔
ترجمان افغان طالبان سہیل شاہین کا مزید کہنا تھا کہ امریکا کے ساتھ معاہدہ مکمل ہو چکا، اور اُس معاہدے پر آج بھی قائم ہیں۔
سہیل شاہین نے کہا کہ وزیر خارجہ شاہ محمود قریشی کے ساتھ ہونے والی ملاقات میں ہم نے تجارت، افغان مہاجرین اور ویزا سہولیات جیسے امور پرمذاکرات کیے، شاہ محمود قریشی نے ہمارے مطالبات پر غور کرنے کا وعدہ کیا ہے۔
