کھیل
Time 29 اکتوبر ، 2019

ورلڈ اسنوکر چیمپئن شپ میں پاکستانی کیوئسٹس کا فاتحانہ آغاز


انٹرنیشنل بلیئرڈز اینڈ اسنوکر فیڈریشن (آئی بی ایس ایف ) ورلڈ اسنوکر چیمپئن شپ ترکی کے شہر انتالیا میں شروع ہوگئی، پاکستانی کیوئسٹس نے پہلے روز اپنے میچز جیت کر ٹورنامنٹ میں فاتحانہ آغاز کیا ، مبشر رضا نے سنچری بریک بھی کھیلا۔

ترکی کے شہر انتالیا میں آئی بی ایس ایف ورلڈ اسنوکر چیمپئن شپ میں 40 ملکوں کے 110 کیوئسٹس شریک ہیں ۔ چیمپئن شپ میں شریک پاکستان کے 4 میں سے تین کیوئسٹس ابتدائی روز ایکشن میں تھے ۔ تینوں کیوئسٹس نے بغیر کوئی فریم ڈراپ کئے فتوحات حاصل کیں ۔

پاکستان نمبر ون محمد آصف نے ترکی کے اینیس باکرشی کو 0-4 سے ہرایا ۔ آصف کی کامیابی کا اسکور 40-58 ، 1-65 ، 38-80 اور 8-91 رہا۔

ایک اور میچ میں پاکستان کے مبشر رضا نے بیلجیم کے کیوین ہنسنس کو شکست دی ۔ مبشر نے کھیل کے پہلے فریم میں 101 کا سنچری بریک بھی کھیلا ۔ مبشر نے اپنے حریف کو مکمل آؤٹ کلاس کرتے ہوئے بقیہ تین فریمز میں بھی ففٹی پلس کی بریکس کھیلیں اور یہ مقابلہ 1-122 ، 10-65 ، 21-75 اور 27-82 سے اپنے نام کیا ۔

پاکستان کے بابر مسیح نے بھی اپنا میچ باآسانی جیت لیا ۔ انہوں نے میزبان ملک کے کیہان دوروکان کو شکست دی ۔ ترکی کے کیوئسٹ بابر کیخلاف پہلے فریم میں کوئی بھی بال پوٹ نہ کرسکے ۔

پاکستان کے ٹاپ کیوئسٹ اور ایشین ٹیم چیمپئن شپ جیتے والی ٹیم کے رکن بابر مسیح نے یہ میچ 0-87 ، 6-71 ، 7-97 اور 8-69 سے جیتا۔

ایونٹ میں بدھ کو محمد آصف نیوزی لینڈ کے میتھیو اسکاربورو، ذوالفقار قادر روس کے آیون کاکوسکل اور بابر مسیح جمہوریہ چیک کے اوسپ زوسمانووچ سے مقابلہ کریں گے۔

مزید خبریں :