کھیل

دنیا کی بہترین آلراؤنڈر بننا چاہتی ہوں: عالیہ ریاض

25 نومبر ، 2019

پاکستان ویمن کرکٹ ٹیم کی آلراؤنڈر عالیہ ریاض کا کہنا ہے کہ وہ کوچز کی نگرانی میں بیٹنگ اور بولنگ کو روزبہتر کرنے کی کوشش کررہی ہیں اور چاہتی ہیں کہ دنیا کی بہترین آلراؤنڈر ز میں شامل ہوں۔

کراچی میں قومی ویمن ٹیم کے کیمپ کے دوران پریس کانفرنس کرتے ہوئے عالیہ ریاض نے کہا کہ ان کی کوشش ہوتی ہے کہ وہ اپنے رول کے حساب سے کھیلیں اور ٹیم کیلئے زیادہ سے زیادہ کردار ادا کریں ۔

یہ بھی پڑھیں

انہوں نے کہا کہ بطور آلراؤنڈر ان کی کوشش ہوتی ہے کہ ہر شعبے میں اچھی کارکردگی کا مظاہرہ کریں ۔

انگلینڈ سے سیریز کے حوالے سے عالیہ ریاض نے کہا کہ انگلینڈ مشکل حریف ہے لیکن پاکستان ٹیم نے بھرپور تیاریاں کی ہیں، انگلینڈ کوپہلے ہرا چکے ہیں، دوبارہ بھی شکست دے سکتے ہیں۔

ستائیس سالہ عالیہ ریاض نے کہا کہ پاکستان ٹیم نے انگلینڈ کے خلاف سیریز کی تیاریوں کے لیے انگلش پلیئر کی ویڈیوز دیکھی ہیں اور اس حساب سے حکمت عملی بھی بنائی ہے،ان کے فاسٹ بولرز سے نبرد آزاما ہونے کے لیے کیمپس میں لڑکوں کی بولنگ کا سامنا کیا ہے تاکہ پیس کی پریکٹس کی جاسکے۔

ایک سوال پر چوبیس ون ڈے اور چھتیس ایک روزہ میچز میں پاکستان کی نمائندگی کرنے والی عالیہ ریاض کا کہنا تھا کہ ثنا میر پاکستان ٹیم کی سینئر پلیئر ہیں، سیریز میں ان کے تجربے کی کمی محسوس کی جائے گی۔

ایک سوال پر انہوں نے کہا کہ پچھلے چند سال کے دوران پاکستان ویمن ٹیم میں بہتری آئی ہے ، ہر کوچ نے اپنے حساب سے ٹیم کو بہتر بنانے میں کردار ادا کیا، مارک کولس نے بھی ٹیم کے لیے اچھا کام کیا اور اب اقبال امام بھی اچھا کام کررہے ہیں جب کہ ہر پلیئر کوچز سے زیادہ سے زیادہ سیکھنے کی کوشش کرتی ہے۔