دلچسپ و عجیب

بارات تاخیر سے پہنچنے پر دولہے کی پٹائی، دلہن نے پڑوسی سے شادی کر لی

09 دسمبر ، 2019

بھارت میں دولہے کو بارات تاخیر سے لانا مہنگا پڑ گیا، دلہن نے مقررہ وقت سے کئی گھنٹے بعد پہنچنے پر گھر والوں کے ساتھ مل کر نا صرف دولہے کی پٹائی کر دی بلکہ اپنے پڑوسی سے شادی بھی کر لی۔

بھارتی میڈیا کے مطابق گاؤں بجنور ننگلجات میں شادی کے دن باراتیوں کے دیر سے آنے پر دلہن اور ان کے گھر والوں نے باراتیوں کو تشدد کا نشانہ بنایا، بعد ازاں دلہن نے اپنے پڑوسی سے شادی کر لی۔

صرف یہی نہیں دلہن کے گھر والوں نے دولہے کے خاندان کو مارنے پیٹنے کے بعد ان کا قیمتی سامان چھین کر انہیں جیل بھی بھجوا دیا۔

پولیس نے انکشاف کیا کہ یہ جوڑا رسم و رواج کے ساتھ ایک روایتی شادی کی تقریب کرنا چاہتا تھا، چھ ہفتے قبل جوڑے نے ایک اجتماعی شادی کی تقریب کے موقع پر شادی کی تھی، اور اس وقت دلہن اپنے سسرال نہیں گئی تھی کیونکہ وہ ایک روایتی شادی کرنا چاہتی تھی۔

یہ بھی پڑھیں

علاوہ ازیں پولیس نے یہ بھی بتایا کہ دونوں خاندانوں میں جہیز کے معاملے کو لے کر بھی اختلافات تھے، دلہن کے خاندان نے دعویٰ کیا کہ دولہا اور اس کے والد نے اُن سے موٹرسائیکل اور نقد رقم کا مطالبہ کیا تھا اور جب ان کا مطالبہ پورا نہیں کیا گیا تو یہ ان کے گھر والوں کو دھمکیاں دے رہے تھے۔

بھارتی میڈیا کے مطابق باراتیوں کو دن کے 2 بجے آنا تھا لیکن وہ رات میں بارات لے کر آئے، تاخیر سے آنے کی وجہ سے دلہن آگ بگولہ ہوگئی اور دلہن کے گھر والوں نے باراتیوں کی مار لگا دی۔

اس تمام تر صورتحال کے بعد پولیس نے معاملے کو سلجھایا جس کے بعد دلہن نے کسی اور سے شادی کر لی۔