وزیراعظم کا بھانجا ہو یا کوئی اور ، قانون کی گرفت سے بچ نہیں سکتا، فردوس عاشق

وزیراعظم عمران خان کی معاون خصوصی برائے اطلاعات فردوس عاشق اعوان نے کہا ہے کہ وزیراعظم کا بھانجا ہو یا کوئی اور، کوئی بھی قانون کی گرفت سے بچ نہیں سکتا۔

انہوں نے کہا کہ وکلاء اپنی صفوں میں موجود کالی بھیٹروں کی نشاندہی کریں، لاہور اسپتال میں لگے سی سی ٹی وی کیمروں کی مدد سے توڑپھوڑ اور حملوں میں ملوث وکلاء کے خلاف کاروائی کی جائے گی۔

گورنر پنجاب چوہدری سرور کا بھی کہنا ہے کہ پنجاب انسٹی ٹیوٹ آف کارڈیالوجی (پی آئی سی) کے معاملے پر قانون توڑنے والوں کے خلاف کارروائی ہوگی، چاہے اس کا تعلق کسی بھی خاندان سے ہو۔

وزیراعظم عمران خان کا بھانجا بھی پی آئی سی پر حملے میں ملوث نکلا

حسان نیازی حملہ آوروں کو اکساتے رہے، پتھر اور ڈنڈے مارنے والوں کا ساتھ دیتے رہے، جس پولیس موبائل کو جلایا گیا اس کا دوازہ بھی کھولا

خیال رہے کہ وزیراعظم عمران خان کا بھانجا بیرسٹر حسان بھی پنجاب انسٹی ٹیوٹ آف کارڈیالوجی پر حملہ کرنے میں ملوث نکلا ہے۔

پی آئی سی پر حملہ کرنے والے وکلاء کے جتھے میں وزیراعظم عمران خان کے بھانجے بیرسٹر حسان نیازی بھی شریک تھے اور انہیں مختلف کارروائیاں کرتے دیکھا جاسکتا ہے۔

حسان نیازی حملہ آوروں کو اکساتے رہے، پتھر اور ڈنڈے مارنے والوں کا ساتھ دیتے رہے، جس پولیس موبائل کو وکیلوں نے شعلوں کی نذر کیا اور جلتی موبائل پر ڈانس کیا، اُس پولیس موبائل کا دروازہ حسان نیازی نے ہی اپنے ہاتھوں سے کھولا تھا۔

وکلاء نے پنجاب انسٹی ٹیوٹ آف کارڈیالوجی پر حملہ کیوں کیا؟

گزشتہ روز جو ویڈیو وائرل کی گئی یہ اس کا ردعمل ہے اور اس کی تمام تر ذمہ داری ڈاکٹرز پر ہے: وکیل رہنما شاہنواز اسماعیل

صوبائی حکومت اور پولیس نے ایکشن لیا اور لاٹھی چارج کیا جبکہ وکلاء کو حراست میں لیا لیکن ویڈیو میں حسان نیازی کا چہرہ واضح نظر آنے کے باوجود نہ ایف آئی آر میں حسان نیازی کا نام شامل کیا گیا اور نہ ہی حراست میں لیا گیا۔

پنجاب انسٹی ٹیوٹ آف کارڈیالوجی میں پرتشدد واقعے کا پس منظر

24 نومبر 2019 کو عظیم سندھو نامی وکیل والدہ کے علاج کے لیے پنجاب انسٹی ٹیوٹ آف کارڈیالوجی آیا اور اس دوران کچھ وکیلوں نے قطار سے ہٹ کر دوائی مانگی جس کے بعد اسپتال کے عملے اور ڈاکٹرز سے ان کا جھگڑا ہوا گیا۔

جھگڑے کے بعد وکیلوں نے ڈاکٹروں کیخلاف ایف آئی آر کٹوائی اور بعد میں اس میں دہشت گردی کی دفعات شامل کروائیں۔

وکلاء کا لاہور میں دل کے اسپتال پر حملہ، خاتون سمیت 3 مریض انتقال کرگئے

چند روز قبل اسی اسپتال میں ڈاکٹرز اور وکلاء کا جھگڑا ہوا تھا، ایک ویڈیو وائرل ہوئی جس میں ڈاکٹرز نے وکلاء کا مذاق اڑایا جسے دیکھ کر وکیل مشتعل ہوئے اور اسپتال پر حملہ کردیا

ڈاکٹروں نے منگل کو واقعے پر معافی بھی مانگی ا ور مطالبہ کیا کہ معاملے کے حل کیلئے مشترکہ کمیٹی بنائی جائے اور اسے سفید اور کالے کوٹ کا جھگڑا نہ بنایا جائے۔

تاہم گزشتہ روز ڈاکٹرز کی دوسری ویڈیو وائرل ہوئی جس میں ڈاکٹرز وکیلوں کا مذاق اڑا رہے تھے جس پر وکیلوں کو غصہ آگیا۔

وکیلوں نے سائبر کرائم سیل میں شکایت کرنے کے بجائے اسپتال پر ہی ہلہ بول دیا۔