پاکستان
Time 26 دسمبر ، 2019

پاکستان سمیت دنیا کے مختلف حصوں میں سورج گرہن

پاکستان سمیت دنیا کے مختلف حصوں میں آج رواں سال کا آخری سورج گرہن ہے۔

آج پاکستان سمیت ایشیا، آسٹریلیا، یورپ، افریقا، بحرہند اور بحرالکاہل میں رواں برس کا آخری سورج گرہن  ہے۔

پاکستان کے تمام جنوبی علاقوں میں 20 سال بعد سورج گرہن ہوا، اس سے قبل 11 اگست 1999 کو پاکستان میں سورج گرہن ہوا تھا۔

محکمہ موسمیات کے مطابق کراچی میں سورج گرہن کا آغاز صبح 7 بج کر 34 منٹ ہوا جو 8 بج کر 37 منٹ پر عروج کو پہنچا تھا۔ اس کا نظارہ 8 بج کر 58 منٹ پر دیکھا گیا تاہم اس کا مکمل اختتام  دوپہر ایک بج کر 6 منٹ پر ہوگا۔

محکمہ موسمیات کے حکام کا کہنا ہے کہ کراچی میں سورج گرہن 80 فیصد تک ہوا جو صبح 10 بج کر 10 منٹ پر ختم ہوا۔

کوئٹہ میں سورج گرہن کا آغاز صبح 7 بجکر 39 منٹ پر ہوا، وادی کے اطراف میں بلند و بالا پہاڑوں کی وجہ سے شہر میں 8 بجے کے بعد سورج گرہن دیکھا گیا۔ 

وادی کوئٹہ میں 8 بج کر 48 منٹ پر واضح جزوی سورج گرہن اپنے عروج پر پہنچا اور تقریباً 64 فیصد تک سورج کو گرہن لگا رہا جو  10 بج کر 8 منٹ پر اختتام پذیر ہوگیا۔

محکمہ موسمیات کے مطابق وفاقی دارالحکومت اسلام آباد میں صبح 7 بج کر 50 منٹ پر سورج گرہن کا آغاز ہوا جو 8 بج کر 57 منٹ پر عروج کو پہنچا اور 10 بج کر 15 منٹ پر ختم ہوگیا۔

لاہور میں سورج گرہن کا آغاز صبح 7 بج کر 47 منٹ پر ہوا جو 10 بج کر 54 منٹ پر  ختم ہوا۔ 

مظفرآباد میں واضح جزوی سورج گرہن 8 بج کر 59 منٹ اور گلگت میں 9 بج کر01 منٹ پر ہوا۔

پاکستان میٹرو لوجیکل ڈیپارٹمنٹ (پی ایم ڈی) کے مطابق یہ سورج گرہن پاکستان میں 20 سال پہلے 1999 میں جزوی طور پر دیکھا گیا تھا۔

اس سال کے آخری سورج گرہن کو ’رنگ آف فائر‘ کا نام دیا گیا ہے کیوں کہ سورج کو جب گرہن لگتا ہے تویہ مکمل طور پر چاند کی وجہ سے ڈھک جاتا ہے اور گرہن کی وجہ سے صرف سورج کے کنارے ہی نظر آتے ہیں۔

سورج گرہن کے لیے نماز کسوف

سورج گرہن کے دوران ملک کے مختلف شہروں میں نماز کسوف کا اہتمام کیا گیا تھا۔

کراچی کے علاقے ڈیفنس فیز 4 سمیت مختلف علاقوں کی مساجد میں نماز کسوف ادا کی گئی جس میں شرکت کے لیے شہری بڑی تعداد میں موجود تھے۔

نماز کسوف کے دوران استغفار اور  امت مسلمہ اور ملک کی سلامتی کے لیے خصوصی دعائیں کی گئیں۔

ماہرین کی شہریوں کیلئے ہدایات

ماہرین نے شہریوں کو سورج گرہن کے دوران احتیاط برتنے کی ہدایات جاری کرتے ہوئے کہا ہے کہ سورج گرہن کو براہ راست نہ دیکھیں۔

انہوں نے شہریوں کو ہدایت جاری کی ہیں کہ سورج گرہن کو حفاظتی چشمہ لگا کر دیکھا جا سکتا ہے۔

مزید خبریں :