02 جنوری ، 2020 
کراچی: ٹریفک کانسٹیبل پر تشدد میں ملوث چینی باشندہ 2 روزہ ریمانڈ پر پولیس کے حوالے
02 جنوری ، 2020
کراچی کے علاقے قیوم آباد میں ٹریفک پولیس اہلکار پر تشدد کرنے والے چینی تاجر کو مقامی عدالت نے دو روزہ ریمانڈ پر پولیس کے حوالے کر دیا۔
گزشتہ روز قیوم آباد فلائی اوور کے نیچے ایک شاپنگ مال کے باہر نو پارکنگ زون میں زبردستی پارکنگ کرنے کے دوران چینی باشندہ لاقانونیت پر اتر آیا اور گاڑی پارک کرنے سے منع کرنے والے ٹریفک کانسٹبل محمد عامر کو تشدد کا نشانہ بنا ڈالا جس سے وہ زخمی ہو گیا تھا۔
واقعے کے بعد کورنگی انڈسٹریل ایریا پولیس نے چینی ملزم سونگ پوپینگ کوگرفتار کر لیا تھا اور اس کے زیراستعال گاڑی بھی قبضے میں لے لی تھی۔
پولیس کے مطابق ملزم سونگ پوپینگ بزنس ویزے پر پاکستان آیا ہوا ہے۔ گرفتاری کے بعد چینی ملزم کو کورنگی انڈسٹریل ایریا انوسٹی گیشن پولیس نے جوڈیشل مجسٹریٹ شرقی کی عدالت میں پیش کیا۔
ملزم کے خلاف مقدمہ الزام نمبر 2020/6 زیر دفعہ 353/186/337 اے ون درج کیا گیا تھا۔
پولیس نے اس واقعے کی سی سی ٹی وی فوٹیج بھی ریلیز کر دی تھی۔
ملزم کی طرف سے کوئی وکیل عدالت میں پیش نہیں ہوا تاہم سرکاری وکیل نے پولیس کی پیروی کی اور ملزم کو ریمانڈ پر پولیس کے حوالے کرنے کی درخواست کی۔
عدالت نے سرکاری وکیل کی استدعا منظور کرتے ہوئے ملزم کو دو روزہ جسمانی ریمانڈ پر پولیس کے حوالے کر دیا۔
