کراچی: انگریزی تعلیم دینے والے مدرسے کا ٹیچر طالبعلم کیساتھ زیادتی کے الزام میں گرفتار
11 جنوری ، 2020
کراچی کے علاقے کورنگی میں دینی کے ساتھ انگریزی تعلیم دینے والے مدرسے میں کمسن طالب علم کے ساتھ مبینہ زیادتی کے الزام میں ٹیچر کو گرفتار کر لیا گیا۔
ایس ایس پی کورنگی فیصل عبداللہ چاچڑ کے مطابق کورنگی میں واقع مدرسے میں زیر تعلیم 6 سالہ بچے کے والد نے رپورٹ درج کرائی کہ کے جی ٹو میں زیر تعلیم ان کے بچے کو مدرسے کے ایک ٹیچر نے بریک کے وقت کلاس روم میں روک لیا۔
متاثرہ بچے کے والد کے مطابق جب تمام بچے کلاس روم سے سے باہر چلے گئے تو ٹیچر متعلقہ نے ان کے بچے سے زبردستی زیادتی کی، ان کا بیٹا روتا ہوا گھر آیا اور اپنے ساتھ پیش آنے والے پورا واقعہ بتایا۔
پولیس کے مطابق والد کی رپورٹ پر ٹیچر کے خلاف مقدمہ درج کرکے اسے گرفتار کر لیا گیا ہے۔
ایس ایس پی کے مطابق متاثرہ بچے کا اسپتال میں طبی معائنہ کرا لیا گیا ہے، ملزم کا بھی طبی معائنہ کرایا جا رہا ہے اور اس سلسلے میں مزید تفتیش جاری ہے۔
خیال رہے کہ چند روز قبل بھی مانسہرہ میں ایک مدرسے کے طالبعلم کے ساتھ زیادتی اور تشدد کا واقعہ سامنے آیا تھا جس کے معلم کو گرفتار کر کے تحقیقات شروع کر دی گئی ہیں۔
