بالوں کو کَس کر باندھنے والی خواتین یہ ضرور پڑھیں

اکثر خواتین جب گھر کی صفائی یا دیگر کام کاج کر رہی ہوتی ہیں تو وہ اپنے بال منہ پر آنا پسند نہیں کرتیں اور  اس پریشانی سے بچنے کے لیے خواتین اونچی پونی ٹیل یا جوڑا باندھ لیتی ہیں۔

اس طرح کی پونی ٹیل اور جوڑا باندھنا ہمیں ایک آسان حل  لگتا ہے جس سے بال منہ پر نہیں آتے اور ہم آسانی سے اپنے کام پر توجہ رکھتے ہیں۔

لیکن کیا آپ یہ بات جانتے ہیں کہ اس طرح بالوں کو کَس کر باندھنا سر درد کا باعث بھی بن سکتا ہے؟

بالوں کو کَس کر سمیٹ کر باندھنا سر میں درد کا باعث بن سکتا ہے، یہی وجہ ہے کہ ہماراہئیر اسٹائل یعنی بال باندھنے کے طریقے کا تعلق سر درد سے براہِ راست ہوتا ہے۔

کَس کے بال باندھنے سے کیا ہوتا ہے؟

بالوں کو سمیٹ کر کَس کے باندھنے سے بالوں کے ’فولیکلز‘ کھنچتے ہیں جس کی وجہ سے سر درد ہوسکتا ہے کیونکہ بالوں کے ’فولیکلز بے شمار نسوں سے جڑے ہوتے ہیں اور بالوں کو کس کر باندھنے کی وجہ سے سر میں تکلیف شروع ہوجاتی ہے۔

درد شقیقہ میں فوری آرام کے آسان ٹوٹکے

درد شقیقہ سے نجات کے لیے ہر بار گولی کھانے سے صحت پر منفی اثرات مرتب ہو سکتے ہیں۔

ایسے لوگ جو دردِ شقیقہ کا شکار رہتے ہیں ان میں بال بنانے کے طریقے کی وجہ سے سر درد ہونے کے امکانات زیادہ ہوجاتے ہیں۔

ضروری ہے کہ خواتین اس طرح کے بال بنانے سے گریز کریں جس کی وجہ سے اسکیلپ یعنی سر کی جلد پر دباؤ محسوس ہو، کَس کر پونی یا جوڑا ہرگز نا بنائیں، اس کے برعکس آپ ان ہی ہئیر اسٹائلز کو بنانا چاہتے ہیں تو اسے ڈھیلا ڈھالا بنائیں۔

سر درد کے علاوہ کَس کر بال باندھنے کے اثرات

کَس کر بال باندھنے سے نا صرف سر درد ہوتا ہے بلکہ اس کی وجہ سے وقت گزرنے کے ساتھ ساتھ بال گرنا بھی شروع ہوجاتے ہیں جس کی وجہ سے سب سے پہلے پیشانی چوڑی یعنی کشادہ ہونا شروع ہوجاتی ہے۔