26 جنوری ، 2020 
نواز شریف نے شاہد خاقان عباسی کو کیا خصوصی ہدایت دی؟
26 جنوری ، 2020
لندن میں زیر علاج سابق وزیر اعظم نواز شریف نے مسلم لیگ (ن) کے سینئر رہنما شاہد خاقان عباسی کو ایل این جی کیس میں درخواست ضمانت دائر کرنے کی ہدایت کر دی۔
پارٹی ذرائع کے مطابق نواز شریف نے شاہد خاقان عباسی کو پہلے پیغام بھیجا، پھر کال کر کے ہدایت کی کہ وہ ایل این جی کیس میں درخواست ضمانت دائر کریں۔
ذرائع نے بتایا کہ نواز شریف نے کہا کہ بدنام زمانہ احتساب کے خلاف توانائیاں ضائع کرنے کی ضرورت نہیں، سب جانتے ہیں کہ مقدمات من گھڑت ہیں۔
نواز شریف کا کہنا تھا کہ شاہد خاقان عباسی کو ضمانت کا قانونی حق استعمال کرنا چاہیے۔
یاد رہے کہ قومی احتساب بیورو (نیب) نے شاہد خاقان عباسی کو ایل این جی کیس میں 18 جولائی کو گرفتار کیا تھا۔
اس کیس میں سابق وفاقی وزیر خزانہ مفتاح اسماعیل سمیت دیگر 7 ملزمان کو بھی نامزد کیا گیا تھا، مفتاح اسماعیل اس کیس میں ضمانت پر رہا ہیں جب کہ شاہد خاقان عباسی نے درخواست ضمانت دائر کرنے سے انکار کر رکھا ہے۔
