09 فروری ، 2020 
برطانیہ میں کورونا وائرس سے متاثرہ افراد کی تعداد 4 ہوگئی
09 فروری ، 2020
لندن میں ایک اور شخص میں کورونا وائرس کی تصدیق ہوئی ہے جس کے بعد برطانیہ میں متاثرہ افراد کی تعداد 4 ہوگئی۔
برطانوی میڈیا کے مطابق حکام کی جانب سے ایک اور مریض میں کورونا وائرس کی تشخیص کی تصدیق کی گئی ہے۔
حکام نے بتایا کہ یہ مریض فرانس میں کورونا وائرس سے متاثرہ ایک برطانوی شہری سے رابطے میں تھا اور وہیں سے یہ شخص وائرس سے متاثر ہوا۔
کورونا وائرس سے متاثرہ شخص کا لندن کے رائل فری اسپتال میں علاج جاری ہے۔
دوسری جانب برطانیہ نے کورونا وائرس سے سب سے زیادہ متاثر ہونے والے چینی شہر ووہان سے اپنا آخری شہری بھی نکال لیا۔
رپورٹ کے مطابق ووہان سے 200 مسافروں کو لے کر جہاز برطانیہ پہنچ گیا، جہاز میں 105 برطانوی شہریوں سمیت دیگر یورپی ممالک کے 95 شہری بھی شامل تھے۔
ووہان سے آنے والے تمام مسافروں کو محکمہ صحت کی خصوصی ٹیم نے ایک ہوٹل میں منتقل کردیا ہے جہاں ان سب کو 14 دن تک قرنطینہ میں رہنا پڑے گا۔
کورونا وائرس سے ہلاکتیں 800 سے تجاوز کر گئیں
خیال رہے کہ چین سمیت دنیا بھر میں تیزی سے پھیلنے والے کورونا وائرس پر تاحال قابو نہیں پایاجا سکا ہے اور پُراسرار وبا سے مزید 89 ہلاکتوں کے بعد مرنے والوں کی تعداد 813 تک پہنچ گئی ہے۔
دنیا بھر میں 37 ہزار سے زائد افراد کورونا وائرس میں مبتلا ہیں۔
عالمی ادارہ صحت نے امکان ظاہر کیا ہے کہ خطے میں کورونا وائرس کی صورتحال اب مستحکم ہونا شروع ہو گئی ہے تاہم سنگاپور میں مزید7 کیسز رپورٹ ہونے سے وہاں متاثرہ افراد کی تعداد 40 ہو گئی ہے۔
مزید خبریں :
غزہ پر اسرائیلی بمباری سے مزید 38 فلسطینی شہید
26 منٹ پہلے
مزید 2 ممالک آئندہ سال شینگن ممالک کا حصہ بننے کو تیار
22 نومبر ، 2024
حزب اللہ کے راکٹ حملے میں اسرائیلی شہری ہلاک
22 نومبر ، 2024
چچا کے تھپڑ مارنے پر 3 سالہ بھتیجی جان سے چلی گئی
22 نومبر ، 2024
