05 مارچ ، 2020 
عورت مارچ کے مخالف پرانی دنیا میں رہتے ہیں ان کا دور گیا، بلاول
05 مارچ ، 2020
پاکستان پیپلز پارٹی کے چيئرمین بلاول بھٹو زرداری کا کہنا ہے کہ جو لوگ کہتے ہیں کہ عورت مارچ نہیں کرسکتی وہ پرانی دنیا میں رہتے ہیں ان کا دور گزر چکا ہے۔
ایوانِ اقبال لاہور میں خواتین کنونشن سے خطاب کرتے ہوئے چیئرمین پیپلز پارٹی بلاول بھٹو زرداری نے کہا کہ عورت مارچ کوئی نہیں روک سکتا، کسی کویہ اجازت نہیں دیں گے کہ اس ملک کی عورتوں کو بتائیں کہ سیاست کیسے کرنی ہے۔
بلاول بھٹو زرداری کا کہنا تھا کہ آج کے پاکستان میں عورت مارچ بھی کرے گی، ڈاکٹر اور وکیل بھی بنے گی، وزیراعظم بھی بنے گی،کوئی سیاستدان، مولانا اور ٹی وی پر بیٹھا اینکر ان کا راستہ نہیں روک سکتا۔
چیئرمین پیپلز پارٹی کا کہنا تھا کہ ہماری جماعت تاریخ بناتی ہے، عورتوں کے حقوق میں اس کا کردار سب سے زیادہ ہے ، جو جماعت ماضی میں بے نظیر بھٹو کی مخالف تھی اب وہ بھی کہتی ہے عورت کے پاس قیادت ہونی چاہیے۔
بلاول کاکہنا تھا کہ نواز شریف اور عمران خان نے یہ نہیں سوچا کہ وہ اپنے عوامی منصوبے لائیں بلکہ انہوں نے اپنی توجہ بے نظیر کی تصویر ہٹانے پر مرکوز رکھی، مسلم لیگ ن نے وسیلہ صحت کو وزیراعظم پروگرام کا نام دیا اور تحریک انصاف نے وسیلہ صحت کو صحت انصاف کارڈ کا نام دے دیا۔
ان کا کہنا تھا کہ نوجوان پاکستان کے لیے نوجوان قیادت کی ضرورت ہے، ہم نے موجودہ حکومت کو بھگانا ہے، پیپلزپارٹی نے پہلے آمروں کو بھی بھگایا اور ان کا مقابلہ کیا ہے۔
