05 مارچ ، 2020 
جیو انٹرٹینمنٹ اور سیونتھ اسکائی نے خلیل الرحمان قمر کے ساتھ معاہدہ معطل کردیا
05 مارچ ، 2020
جیو انٹرٹینمنٹ اور سیونتھ اسکائی انٹرٹینمنٹ نے ایک خاتون کے ساتھ بدزبانی پر معافی مانگنے تک مصنف خلیل الرحمان قمر کے ساتھ اپنا معاہدہ معطل کرنے کا اعلان کر دیا ہے۔
جیو انٹرٹینمنٹ اور سیونتھ اسکائی انٹرٹینمنٹ نے 4 ڈرامہ سیریلز اور ایک فلم کا اسکرپٹ لکھنے کے لیے خلیل الرحمان قمر سے معاہدہ کیا تھا جو کہ نان ایکسکلوزو معاہدہ تھا جیسا کہ ان کا دیگر ٹی وی چینلز کے ساتھ بھی موجود ہے۔
جیو نے اپنے بیان میں کہا ہے کہ "جیو خیالات کے تبادلے اور جیو اور جینے دو کی پالیسی پر یقین رکھتا ہے۔ ہمارا یقین ہے کہ ہر کسی کو اپنے خیالات کے اظہار کا پورا حق ہے اور ہم سمجھتے ہیں ایک توانا بحث کے کلچر کو فروغ ملنا چاہیے مگر یہ بحث شائستگی اور ہر کسی کی عزت کے اصولوں کے ساتھ ہونی چاہیے۔خلیل الرحمان قمر نے نہ صرف ایک خاتون کے ساتھ بدزبانی کی بلکہ اپنی غلطی ماننے اور اس پر معافی مانگنے سے بھی انکار کیا۔ اسی لیے جیو انٹرٹینمنٹ کی انتظامیہ نے ان کے ساتھ کیا جانے والا معاہدہ معطل کرنے کا فیصلہ کیا ہے۔"
بیان میں مزید کہا گیا ہے کہ "جیو بحث مباحثے کی حوصلہ افزائی کرتا ہے چاہے اس میں خود جیو پر تنقید بھی کیوں نہ شامل ہو۔"
یاد رہے کہ معروف مصنف خلیل الرحمان قمر نے گزشتہ دنوں ایک نجی ٹی وی کے پروگرام میں ایک خاتون کے ساتھ عورت مارچ کے معاملے پر بحث کے دوران بدزبانی کی تھی جس پر انہیں سوشل میڈیا پر بھی شدید تنقید کا سامنا کرنا پڑا۔
مزید خبریں :
امریکی اداکار جان کراسنسکی سال 2024 کے پرکشش مرد قرار
13 نومبر ، 2024
