دلچسپ و عجیب

کووڈ-19 سے آگاہی کیلیے پولیس کا 'کورونا ہیلمٹ' کا استعمال

30 مارچ ، 2020

دنیا بھر میں کورونا وائرس سے متعلق آگاہی پھیلانے کے لیے ہر ادارہ ہی سرگرم نظر آرہا ہے اور لوگوں کو وبا کے خطرات سے آگاہ کرنے کے لیے نئی نئی حکمتِ عملی کا بھی سہارا لیا جا رہا ہے۔

اس ضمن میں بھارت میں کورونا سے متعلق آگاہی کے لیے کہیں کورونا کا پتلا بنا کر جلایا گیا تو کہیں کٹھ پتلیوں نے لوگوں کو کورونا وائرس سے متعلق احتیاط برتنے کا پیغام دیا۔

اب بھارتی ریاست چنئی کی پولیس کی جانب سے کورونا وائرس سے متعلق آگاہی کے لیے 'کورونا ہیلمٹ' کا استعمال کیا جا رہا ہے۔

بھارتی میڈیا کے مطابق چنئی کی سڑکوں پر پولیس کو کورونا وائرس کی مائیکرو اسکوپک تصویر کی طرح دکھنے والے تھری ڈی ہیلمٹ پہنے ہوئے دیکھا جا رہا ہے۔

چنئی پولیس کے لیے کووڈ-19 سے متعلق آگاہی پھیلانے کے لیے کورونا ہیلمٹ تیار کرنے والے آرٹسٹ گوتھم کا کہنا ہے کہ بڑی تعداد میں عوام کووڈ-19 کی صورتحال کو لے کر غیر سنجیدہ ہے، جب کہ پولیس ان لوگوں کو مسلسل گھر میں رہنے کی تاکید کر رہی ہے تاکہ وائرس کے پھیلاؤ کو روکا جا سکے۔

یہ بھی پڑھیں

ان کا مزید کہنا تھا کہ میرے دماغ میں اچانک کورونا ہیلمٹ تیار کرنے کا خیال آیا اور اس کے لیے میں نے ٹوٹا ہوا ہیلمٹ اور کچھ کاغذ کا استعمال کیا جب کہ میں نے چند پلے کارڈز بھی تیار کیے ہیں جسے پولیس ڈیوٹی کے دوران ہاتھوں میں اٹھائے ہوئے ہے۔

پولیس انسپکٹر راجیش بابو کا کہنا ہے کہ یہ کورونا ہیلمٹ لوگوں میں آگاہی کے لیے بے حد اچھا ثابت ہو رہا ہے اور اس کے مثبت نتائج سامنے آ رہے ہیں۔

خیال رہے کہ اس سے قبل بھی بھارتی صوبے پنجاب کی پولیس کی جانب سے کورونا وائرس سے متعلق آگاہی پھیلانے کے لیے باری برسی گانے پر ڈانس کیا گیا تھا۔

بھارت میں کورونا وائرس سے متاثرہ مریضوں کی تعداد 1000 سے تجاوز کر چکی ہے جب کہ ہلاکتوں کی تعداد 27 ہے۔