جنگ گروپ کے چیئرمین اور پبلشر میر جاوید رحمان انتقال کرگئے

کراچی: جنگ گروپ کے پبلشر میر جاوید رحمان رضائے الٰہی سے انتقال کرگئے۔

میر صحافت میر خلیل الرحمان کے بڑے صاحبزادے میر جاوید رحمان کراچی کے اسپتال میں زیر علاج تھے جہاں ڈاکٹرز نے ان کو پھیپھڑوں میں کینسر کی تشخیص کی تھی۔

16 اگست 1946 کو میر صحافت میر خلیل الرحمان کے گھر پیدا ہونے والے میر جاوید رحمان ایک غیر معمولی آدمی تھے، ان کی صحافتی زندگی نصف صدی سے کچھ زائد عرصے  پر مشتمل رہی، میر خلیل الرحمٰن نے اپنے بڑے صاحبزادے کو اپنے صحافتی وژن کے اعتبار سے گروم کیا تھا۔

جنگ میڈیا گروپ کے بانی میرکارواں میر خلیل رحمان کے بڑے بیٹے کی حیثیت سے میر جاوید رحمان کو اپنے والدکی طرف سے صحافت اورسچ اور آزادی اظہار رائے جیسا جوش و جذبہ وراثت میں ملا۔

میرجاوید رحمان کی رہ نمائی اور سربراہی میں جنگ گروپ پاکستان کا سب سے بڑا میڈیا گروپ بن گیا جس کے تحت کئی اخبارات، رسائل اور ٹی وی چینلز کام کررہے ہیں۔

یہ بے باک صحافتی ادارہ مختلف قوتوں کے متعدد حملوں سے نبرد آزما رہا ہے، جنگ گروپ معاشی دباؤ اور جبر کے باوجود عوام کی خدمت اور عوامی رائے کو جاری رکھا۔

جنگ میڈیا گروپ کے بقا کا راز پیشہ ور صحافی، تجزیہ کاروں اور کالم نگاروں کی ایک بڑی تعداد ہے جو آزادی اظہار رائے کو دبانے اور ارباب اقتدار کے سامنے سچ بولنے کی کوشش کرتی ہے اور دباؤ کی مزاحمت کرتے ہیں۔ 

جنگ گروپ انتظامیہ اپنے گروپ میں بحث و مباحثے کی حوصلہ افزائی کرتی ہے اور ایسا ماحول پیدا کرتی ہے جہاں دباؤ کا مقابلہ کیا جاسکتا ہے۔

واضح رہے کہ مرحوم میر جاوید رحمان کے چھوٹے بھائی میر شکیل الرحمان ان دنوں ایک بے بنیاد کیس میں نیب کی حراست میں ہیں۔

گزشتہ روز انہیں اپنے علیل بھائی سے ملاقات کے لیے کراچی جانے کی اجازت دینے کی خبر سامنے آئی تھی تاہم نیب حکام ان کو کراچی لے کر نہیں پہنچے اور وہ آخری دنوں میں اپنے بھائی میر جاوید رحمان سے نہ مل سکے۔

مزید خبریں :