ملتان: احساس کفالت کے تحت رقم تقسیم کے دوران بھگدڑ مچنے سے خاتون جاں بحق
10 اپریل ، 2020
ملتان میں احساس کفالت پروگرام کے تحت رقم کی تقسیم کے دوران بھگدڑ مچنے سے خاتون جاں بحق اور 20 افراد زخمی ہو گئے۔
گزشتہ روز سے ملک بھر میں احساس پروگرام کے تحت مستحقین میں 12 ہزار روپے نقد رقوم کی تقسیم کا سلسہ شروع ہوگیا ہے لیکن رقوم کی تقسیم کے دوران بدنظمی دیکھنے میں آ رہی ہے۔
ریسکیو 1122 ترجمان کے مطابق ملتان میں گورنمنٹ ایم اے جناح ہائی اسکول اور سینٹرل جیل کے قریب مستحق خواتین میں رقم کی تقسیم کے لیے سینٹر بنایا گیا تھا جسے بدانتظامی کے بعد بند کر دیا گیا تھا اور تمام خواتین کو گورنمنٹ ایم اے جناح ہائی اسکول کے سینٹر بھیج دیا گیا جہاں 4 ہزار سے زائد خواتین جمع ہو گئیں۔
ترجمان کا کہنا ہے کہ اسکول کے سینٹر میں بھگدڑ مچنے سے ایک 70 سالہ خاتون جاں بحق اور 20 زخمی ہوگئیں۔
اس ضمن میں اسٹینٹ کمشنر ملتان عابدہ فرید کا کہنا ہے کہ واقعے کی تحقیقات کی جا رہی ہے، دو دن میں رپورٹ منظر عام پر لائی جائے گی۔
انہوں نے کہا کہ مرنے والی خاتون کی عمر 70 سال تھی اور ایسا لگتا ہے کہ وہ دل کا دورہ پڑنے سے جاں بحق ہوئی ہے۔
