03 مئی ، 2020 
کورونا وائرس کی صورتحال میں بھی بھارت کا رویہ تبدیل نہیں ہوا: شاہ محمود قریشی
03 مئی ، 2020
وزیر خارجہ شاہ محمود قریشی نے کہا ہے کہ بھارت کو احساس نہیں ہے کہ دنیا کس تکلیف سے گزر رہی ہے، کورونا وائرس کی صورتحال میں بھی بھارت کا رویہ تبدیل نہیں ہوا۔
لاہور میں میڈیا سے گفتگو کرتے ہوئے شاہ محمود قریشی کا کہنا تھا کہ بھارتی رویے کے خلاف سیکیورٹی کونسل کو خط لکھا ہے، بھارتی بربریت کے خلاف ہر فورم پر آواز اٹھائیں گے۔
وزیر خارجہ کا کہنا تھا کہ چین نے اس مشکل وقت میں ہماری بہت مدد کی ہے، کورونا وائرس سے عالمی معیشت کو نقصان پہنچا ہے اور اس مشکل وقت میں عمران خان ترقی پذیر ممالک کی آواز بنے ہیں۔
ان کا کہنا تھا کہ آج بھی کورونا کے باعث 2 ڈاکٹرز کے شہید ہونے کی اطلاع ملی ہے، مشکل حالات میں کام کرنے والوں کو خراج تحسین پیش کرتا ہوں، سول ڈیفنس والوں کو 3 ماہ کی تنخواہ نہیں ملی تھی مگر انہوں نے کام کیا جب کہ پاکستانی ڈاکٹرز بیرون ملک بھی پاکستان کا نام روشن کررہے ہیں۔
انہوں نے مزید کہا کہ حکومت سمجھتی ہے کہ کورونا کا معاملہ لمبا ہے،کیا ہم اتنا لمبا لاک ڈاؤن برداشت کرسکتے ہیں؟ ہمیں لوگوں کی جانوں کو بچانا ہے، وزیراعظم تمام تر صورتحال کو سامنے رکھ کر فیصلے کر رہےہیں۔
