یونس خان کا کھلاڑیوں کو مسلسل محنت اور کبھی ہمت نہ ہارنے کا مشورہ

ٹیسٹ کرکٹ میں پاکستان کی جانب سے سب سے زیادہ رنز بنانے والے سابق کرکٹر یونس خان نے کہا ہے کہ نمایاں بلے بازی کے لیے کارکردگی میں تسلسل لانا ضروری ہے۔

قومی کرکٹ ٹیم کے موجودہ اور ایمرجنگ بلے بازوں کو کریز پر مزاحمت کرنے کا جذبہ پیداکرنے کی ہدایت کرتے ہوئے سابق کرکٹر نے کھلاڑیوں سے ایک اچھے بیٹسمین کے ساتھ ساتھ فیلڈنگ میں بہتری لانے پر بھی زور دیا۔

بیٹسمین کی آنکھوں میں آنکھیں ڈال کر اسے خوف کا شکار کرو، شعیب اختر

نوجوان فاسٹ بولر نسیم شاہ دوسرے وقار یونس، شاہین آفریدی وسیم اکرم اور محمد عباس، محمد آصف بننے کی صلاحیت رکھتے ہیں، راولپنڈی ایکسپریس

یونس خان نے کہا کہ فیلڈنگ میں بہتری کھلاڑی کی انفرادی محنت پر منحصر ہوتی۔

یونس خان نے موجودہ کھلاڑیوں کو مضبوط کردار اور قربانی کا جذبہ پیدا کرنے کا مشورہ دیا اور کہا کہ وسیم اکرم اور وقار یونس نے ٹوٹی ہڈیوں کے ساتھ بھی پاکستان کی نمائندگی کی۔

انہوں نے کہا کہ بڑا کرکٹر بننے کے لیے زندگی میں خود کو چیلنج کرنا سیکھیں، جب آپ خود سے سوال کریں گے تو بہتری کی جانب بڑھیں گے۔

سابق کپتان یونس خان کا آن لائن لیکچر میں کہنا تھا کہ دیانتداری اور جامع منصوبہ بندی ایک عام کھلاڑی کو لیجنڈ کرکٹر میں تبدیل کردیتی ہے۔

ہمیشہ خود کو چیلنج کریں ، بابر اعظم کے خواتین کھلاڑیوں کو آن لائن مشورے

اب بھی دنیا کے ٹاپ بلے بازوں کی بیٹنگ دیکھتا ہوں تاکہ مختلف مراحل میں حکمت عملی بناسکوں، بابر اعظم کی ویڈیو لنک کے ذریعے گفتگو

عمران خان کی مثال دیتے ہوئے یونس خان نے کہا کہ اپنی زندگی میں ان کی دیانتداری اور منصوبہ بندی نے انہیں وزیراعظم کے منصب تک پہنچا دیا ہے۔

خیال رہے کہ یونس خان نے 118 ٹیسٹ میچوں میں 10099رنزبنائے۔

طویل طرز کی کرکٹ میں 52 اعشاریہ 5 کی اوسط سے رنز بنانے والے یونس خان کے کیریئر میں 34 سنچریاں اور 33 نصف سنچریاں شامل ہیں۔

سابق کرکٹر نے ایک روزہ اور ٹی ٹوئنٹی کرکٹ میں بالترتیب 7249 اور442 رنز بنائے۔

پی سی بی کی جانب سے منعقدہ آن لائن سیشنز میں سابق کھلاڑیوں کا موجودہ کرکٹرز کو آن لائن لیکچرز دینے کا سلسلہ جاری ہے۔

اس سے قبل ماضی کے عظیم کرکٹرز جاوید میانداد، وسیم اکرم، راشد لطیف، مشتاق احمد ،محمد یوسف اور شعیب اختربھی قومی کرکٹرز کو آن لائن ٹپس دے چکے ہیں۔