11 مئی ، 2020 
پرائیوٹ اسکولز اینڈ کالجز ایسوسی ایشن نے تعلیمی اداروں کی بندش کا اعلان مسترد کردیا
11 مئی ، 2020
آل سندھ پرائیوٹ اسکولز اینڈ کالجز ایسوسی ایشن نے وفاق کا تعلیمی اداروں کی طویل بندش اور امتحانات کی منسوخی کا اعلان مسترد کر دیا۔
آل سندھ پرائیوٹ اسکولز اینڈ کالجز ایسوسی ایشن کے چیئرمین حیدر علی کا کہنا تھا کہ تعلیمی اداروں کی طویل بندش اور امتحانات کی منسوخی کااعلان مسترد کرتے ہیں۔
انہوں نے کہا کہ ہفتے میں 4 دن روزانہ دو شفٹ میں اسکولز کھولے جا سکتے ہیں جبکہ امتحانات بھی احتیاطی تدابیر اور نئے شیڈول کے ساتھ منعقد ہو سکتے ہیں۔
ان کا کہنا ہے کہ اسکول کی پہلی شفٹ کا وقت صبح 7:30 سے 10:30 تک ہوسکتا ہے جبکہ دوسری شفٹ 11:00 بجے سے دوپہر 2:00 بجے تک ہو سکتی ہے۔
انہوں نے مطالبہ کیا کہ اسکول 15 جون سے کھولنے کی اجازت دی جائے۔
چیئرمین کا کہنا تھا کہ اسکولوں میں تھرمل اسکینر اور سینیٹائزنگ واک تھرو گیٹ لگائے جائیں اور ہر بچے اور اسٹاف کے لیے ماسک کا انتظام کیا جائے۔
انہوں نے مزید کہا کہ احتیاط کے طور پر ایک ڈیسک پر ایک بچے کو بٹھایا جائے۔
خیال رہے کہ گزشتہ دنوں کورونا وائرس کے باعث وفاقی حکومت نے تعلیمی ادارے 15 جولائی تک بند رکھنے کا اعلان کیا تھا۔
وفاقی وزیر تعلیم شفقت محمود نے کہا تھا کہ صورتحال کی وجہ سے بورڈز کے امتحانات ملتوی نہیں بلکہ ختم کردیے ہیں جس کے بعد اب نویں، دسویں، گیارہویں اور بارہویں کے امتحانات نہیں ہوں گے۔
شفقت محمود نے کہا تھا کہ نویں، دسویں، گیارہویں اور بارہویں جماعت کےطلبہ کو سابقہ نتائج پر اگلی کلاسز میں ترقی دی جائے گی۔
