ملک میں فضائی آپریشن جزوی بحال، کراچی سے پہلی پرواز روانہ

کورونا وائرس کی وجہ سے ملک میں نافذ لاک ڈاؤن کے باعث تقریباً ڈیڑھ ماہ بعد فضائی آپریشن جزوی طور پر بحال ہوگیا۔

پی آئی اے اور نجی ائیرلائنز نے آج سے اندرون ملک آپریشن شروع کردیا جس میں لاہور، اسلام آباد، کراچی، کوئٹہ اور پشاور میں پروازیں چلائی جارہی ہیں۔

ترجمان پی آئی اے کے مطابق جزوی بحالی کے بعد پہلی پرواز پی کے 8304 کراچی سے 84 مسافروں کو لے کر لاہور روانہ ہوئی جب کہ  نجی ائیرلائن کی پرواز اسلام آباد روانہ ہوگئی۔

ترجمان نے بتایا کہ  پی آئی اے کے تمام طیاروں کو پرواز سے قبل مکمل طور پر ڈس انفیکٹ کیا جارہا ہے۔

ترجمان کا کہنا تھا کہ مسافر جب ائیرپورٹ پہنچے تو سب سے پہلے ان کا درجہ حرارت چیک کیا گیا اور ائیر پورٹ میں داخلے کے وقت سماجی فاصلے کا خیال بھی رکھا جارہا ہے۔

ترجمان کے مطابق طیارے کے اندر بھی مسافروں کو ایک نشست چھوڑکر بٹھایا جائے گا جب کہ ائیرلائن مسافروں کو ماسک اور ہینڈ گلووز فراہم کرنے کی پابند ہوگی۔

اس کے علاوہ پرواز کی روانگی سے قبل طیارے میں اسپرے کے بعد سول ایوی ایشن سے سرٹیفکیٹ لینا لازمی ہوگا، 5 مخصوص ائیرپورٹس پر اندرون ملک روانگی اور آمد پرڈس انفیکٹنٹ اسپرے کیا جائے گا۔

ائیرپورٹ اسٹاف اور مسافرپارکنگ ایریاز سے آگے نہیں جاسکیں گے اور  ہر قسم کا پروٹوکول ختم کر دیا گیا ہے  جب کہ کریو کے لیے حفاظتی لباس، این 95 ماسک اور سرجیکل گلوزکا استعمال لازمی ہوگا، اس کے علاوہ مسافروں کوپرواز میں کھانا فراہم نہیں کیا جائے گا۔

انٹرنیشنل فضائی آپریشن کی بندش میں توسیع

دوسری جانب سول ایوی ایشن نے بین الاقوامی پروازوں کی معطلی میں 30 مئی تک توسیع کردی تاہم بیرون ملک 7 ہزار پاکستانیوں کو عید سے پہلے واپس لانے کا اعلان کیا ہے جس کے تحت امریکا سے 12 پروازیں مسافروں کو وطن لائیں گی جب کہ ووہان اور چین میں پھنسے طالبعلموں کو لینے پرواز 18 مئی کو روانہ ہوگی۔

علاوہ ازیں وزیراعظم کے معاون خصوصی زلفی بخاری نے چین میں پھنسے طلبا کے والدین سے ملاقات کی اور کہا کہ حکومت ان طلبا کی وطن واپسی کےلیے رعایتی ائیرٹکٹس کی سہولت فراہم کرے گی، 18 مئی کو چین سے 300 طلبا کو وطن واپس لایا جائے گا۔