31 مئی ، 2020 
پاکستان
اسلام آباد میں ماسک پہننا لازمی قرار، خلاف ورزی پر قید اور جرمانے کی سزا ہوگی
31 مئی ، 2020
اسلام آباد میں عوامی مقامات پر ماسک پہننا لازمی قرار دے دیا گیا ہے اور خلاف ورزی کی صورت میں جرمانے اور جیل کی سزا دی جائے گی۔
ڈپٹی کمشنراسلام آباد حمزہ شفقات کے مطابق وفاقی دارالحکومت کی حدود میں تمام عوامی مقامات پر ماسک پہننا لازمی قرار دیا گیا ہے۔
حمزہ شفقات کا کہنا تھاکہ مارکیٹوں، عوامی مقامات، مساجد، پبلک ٹرانسپورٹ، گلیوں، سڑکوں اور دفاتر میں چیکنگ ہوگی اور ماسک پہننے کی ہدایت پر مکمل عمل درآمد کرایا جائے گا۔
انہوں نے کہا کہ ماسک نہ پہننے والوں پر جرمانہ ہوگا اور انہیں دفعہ 188 کے تحت جیل بھی بھیجا جاسکےگا۔
خیال رہے کہ اسلام آباد میں کورونا سے متاثرہ افراد کی مجموعی تعداد 2418 ہوگئی ہے جب کہ 27 افراد ہلاک ہو چکے ہیں۔
