24 جون ، 2020 
لاہور کے 7 علاقے مکمل سیل کرنے کا حکم
24 جون ، 2020
پنجاب حکومت کی ہدایت پر لاہور میں کورونا وائرس کے زیادہ کیسز والے علاقے آج رات 12 بجے سے بند کردیے جائیں گے۔
ڈپٹی کمشنر لاہور دانش افضال کے مطابق آج رات 12بجے سے ڈی ایچ اے، گلبرگ،گلشن راوی،گارڈن ٹاؤن، فیصل ٹاؤن، ماڈل ٹاؤن اور اولڈ سٹی 30 جون تک مکمل بند رہیں گے۔
ڈپٹی کمشنر نے بتایا کہ مذکورہ علاقوں میں تمام بازار بھی بند رہیں گے۔
واضح رہے کہ چیف سیکرٹری پنجاب جواد رفیق ملک کی سربراہی میں کورونا کی صورتحال اور لاک ڈاؤن سےمتعلق اجلاس میں لاہور سمیت صوبے کےدیگر 33 مقامات کو سیل کرنے کی منظوری دی گئی۔
ذرائع کا کہنا ہےکہ پنجاب کے متعدد علاقوں میں کورونا کیسز میں اضافہ ہوا ہے جس کے باعث متعلقہ علاقوں کو سیل کرنے کا فیصلہ کیا گیا ہے جب کہ چیف سیکرٹری نے کورونا کیسز سے نمٹنے کے لیے ایس او پیز پر ہر صورت عملدرآمد کرنے کا حکم دیا ہے۔
واضح رہے کہ پنجاب میں کورونا کیسز کی تعداد 69536 ہوگئی ہے جب کہ صوبے میں اب تک 1516 افراد اس وائرس کی وجہ سے جاں بحق ہوئے ہیں۔
