30 جون ، 2020 
پاکستانی کرکٹرز کے انگلینڈ میں ہونے والے کورونا ٹیسٹ کے نتائج سامنے آگئے
30 جون ، 2020
پاکستان کرکٹ اسکواڈ میں شامل 20 کرکٹرز اور 12 منیجمنٹ اراکین کے انگلینڈ میں ہونے والے کووڈ 19 ٹیسٹ کے نتائج منفی آگئے۔
20 کھلاڑیوں اور 11 منیجمنٹ کے اراکین پر مشتمل پاکستان کرکٹ اسکواڈ 28 جون کو لاہور سے مانچسٹر پہنچا جہاں سے اسی شام اسکواڈ کو ووسٹر پہنچایا گیا جہاں اسکواڈ 14 روز کا قرنطینہ مکمل کرے گی اور اس دوران اسکواڈ کو ٹریننگ کی بھی اجازت ہے۔
بولنگ کوچ وقار یونس نے انگلینڈ میں پاکستان ٹیم کو جوائن کیا ان کا بھی کووڈ 19 ٹیسٹ منفی آیا ہے۔
ووسٹر میں پاکستان اسکواڈ کا کووڈ 19 ٹیسٹ گزشتہ روز ہوا۔ ٹیسٹ کے رزلٹ موصول ہونے کے بعد پی سی بی ذرائع نے اس بات کی تصدیق کی ہے کہ 20 کھلاڑیوں اور 12 منیجمنٹ کے اراکین کے کووڈ ٹیسٹ منفی آئے ہیں اس طرح وہ اب احتیاطی تدابیر کے پروٹوکولز کے مطابق ٹریننگ کر سکیں گے۔
تاخیر سے اسکواڈ جوائن کرنے والے اسپنر ظفر گوہر اور فزیو کلف ڈیکن کی کورونا ٹیسٹ رپورٹس بھی جلد موصول ہو جائیں گی۔
انگلینڈ روانگی سے قبل بھی پاکستانی اسکواڈ کے کورونا ٹیسٹ ہو ئے تھے۔ کھلاڑیوں اور منیجمنٹ کے اراکین کے دو مرتبہ ٹیسٹ منفی آنے کے بعد انہیں انگلینڈ جانے کا اہل قرار دیا گیا تھا۔
اس کے علاوہ پاکستان میں موجود 6 قومی کرکٹرز کا بھی دو سرا کورونا وائرس ٹیسٹ منفی آگیا ہے اور اب یہ کرکٹرز انگلینڈ جانے کے اہل ہیں۔ پی سی بی ان کرکٹرز کے سفری انتطامات میں مصروف ہے ۔
مزید خبریں :
ویڈیو: پیرو میں میچ کے دوران بجلی گرنے سے فٹبالر ہلاک ہوگیا
04 نومبر ، 2024
