01 جولائی ، 2020 
ملک بھر کے بزرگ پنشنرز کیلئے خوشخبری
01 جولائی ، 2020
ملک بھر کے بزرگ پنشنرز کیلئے خوشخبری ہے کہ وفاقی حکومت میں ان کی پنشن میں اضافے کی منظوری دے دی ہے۔
وزیراعظم عمران خان کی زیر صدارت وفاقی کابینہ کا اجلاس ہوا جس میں ایمپلائز اولڈ ایج بینیفٹس انسٹی ٹیوشن (ای او بی آئی) کی پنشن میں اضافےکی منظوری دے گئی۔
ای او بی آئی پنشنرز کو اب 6500 نہیں بلکہ 8500 روپے ملیں گے۔
ای او بی آئی کے ماہانہ پنشن میں اضافے کا اطلاق یکم جنوری 2020 سے ہوگا، بقایہ جات سمیت اضافی پنشن یکم اگست سے حاصل کی جا سکے گی۔
خیال رہے کہ 12 دسمبر 2019 کو وزیراعظم عمران خان نے ای او بی آئی کے تحت پنشن لینے والے افراد کی کم سے کم پنشن ساڑھے 6 ہزار روپے سے بڑھا کر ساڑھے 8 ہزار روپے کرنے کا اعلان کیا تھا۔
21 فروری 2020 کو ای او بی آئی بورڈ نے پنشن میں 2 ہزار روپے اضافے کی منظوری دی تھی جس کا اطلاق یکم جنوری 2020 سے ہونا تھا۔
تاہم 14 اپریل 2020 کو وفاقی کابینہ نے ایمپلائز اولڈ ایج بینیفٹس انسٹی ٹیوشن (ای او بی آئی) کے پنشنرز کی پنشن میں اضافہ مؤخر کردیا تھا۔
اس کے علاوہ کابینہ اجلاس میں کراچی میں پاکستان اسٹاک ایکسچینج پر ناکام حملے کی بازگشت بھی سنائی دی۔
ذرائع کے مطابق وزیراعظم اور کابینہ ارکان نے سیکیورٹی فورسز کو خراج تحسین پیش کیا اور شہیدہونےوالےسیکیورٹی گارڈزاورپولیس اہلکاروں کو خراج عقیدت پیش کیا گیا۔
کابینہ ارکان کا کہنا تھا کہ سیکیورٹی اہلکاروں نےجان کا نذرانہ دے کر بڑی دہشتگردی سے بچایا، پوری قوم سیکیورٹی فورسز کو سلام پیش کرتی ہے، وزیر اعظم نے ایک بار پھر کہا کہ اسٹاک ایکسچینج حملے میں بھارت ملوث ہے۔
