کراچی … کراچی میں برسنے والی رحمت کئی لوگوں کیلئے زحمت بن گئی، مختلف شاہراہوں پر بارش کے پانی میں گاڑیاں پھنسی رہی جبکہ ایڈمنسٹریٹر کراچی نے رین ایمرجنسی نافذ کردی ہے۔ گزشتہ روز ہونے والی بارش کی وجہ سے پانی رات گئے تک سڑکوں پر جمع رہا جس سے متعدد لوگ کو سڑکوں پر ہی رات گزارنے پر مجبور ہو گئے۔ گزشتہ روز کراچی میں بادل خوب گرجے اور پھر برستے ہی چلے گئے۔وقفے وقفے سے ہونے والی بارش نے شہرکی مختلف شاہراہوں پر پانی کھڑا کر دیا، جس کی وجہ سے گاڑیوں کی طویل قطاریں لگ گئیں اور پانی زیادہ ہونے سے کئی گاڑیاں بند بھی ہو گئیں، جو رات گئے تک شہر کی مختلف سڑکوں پر کھڑی رہیں اور کچھ لوگ تو ایسے بھی تھے جو گھنٹوں پیدل چلنے کے باوجود اپنی فلائٹ حاصل نہ کر سکے۔ ایک مسافر نے بتایا کہ مجھے لندن جانا تھا میں ٹریفک جام کی وجہ سے پیدل ہی چلا لیکن ٹائم پر نہیں پہنچ سکا۔لیکن اس صورتحال میں بڑی گاڑیوں والے حضرات نے خوب نوٹ بنائے اور پانی سے خراب ہو جانے والی گاڑی کو منزل پر پہنچانے کے منہ مانگے دام وصول کئے۔ ایک گاڑی مالک نے بتایا کہ آپ انتظامیہ کو کیوں کہتے ہیں یہاں تو عوام بھی نوٹ بنانے میں مصروف ہے۔ کراچی والے بھی خوب بارش کا انتظار کرتے ہیں اور جب پانی برستا ہے تو شہری حکومتوں کے تمام دعوے دھرے کے دھرے رہ جاتے ہیں۔